Qazaxıstan neft emalı zavodlarının modernləşdirilməsini sürətləndirir
Astana, 10 fevral, AZƏRTAC
Yanacağa artan tələbatı nəzərə alaraq, Qazaxıstanda mövcud neft emalı zavodlarının modernləşdirilməsini sürətləndirmək lazımdır.
AZƏRTAC Akordanın mətbuat xidmətinə istinadla xəbər verir ki, bu barədə Prezident Kasım-Jomart Tokayev hökumətin genişləndirilmiş iclasında bildirib.
“Qazaxıstan ildə təxminən 100 milyon ton neft istehsal edir, lakin ölkəmiz bunun yalnız 18 milyon tonunu emal edə bilir. Nəticədə neft hasil edən ölkə olaraq, biz ildən-ilə dizel yanacağı çatışmazlığı ilə qarşılaşırıq və reaktiv yanacaq üçün idxaldan əhəmiyyətli dərəcədə asılıyıq”, - deyə dövlət başçısı qeyd edib.
Tokayevin sözlərinə görə, neft emalı zavodlarının modernləşdirilməsi emal olunan xam neftin ümumi həcmini ildə 9 milyon ton - 18,4 milyon tondan 27,4 milyon tona qədər artıracaq.
“Hökumət yeni neft emalı zavodunun tikintisi ilə bağlı əsaslandırılmış qərar qəbul etməlidir. İlk növbədə, xammalın mənbəyini, istehsal olunacaq məhsulları və istehsalın həcmlərini düzgün hesablamalıyıq”, - deyə Prezident vurğulayıb.
Tokayev, həmçinin layihənin həyata keçirilməsi üçün özəl investorlara ehtiyac olacağını qeyd edib.
Dövlət başçısı sözlərinə yekun vuraraq bildirib: “Hazırda bu cür layihələrin yalnız dövlət vəsaiti hesabına həyata keçirilməsi son dərəcə irrasionaldır”.
Elşən Rüstəmov
AZƏRTAC-ın xüsusi müxbiri
Astana
Bölmənin digər xəbərləri
