Qazaxıstan Prezidenti üç nazir postuna təyinatla bağlı sərəncamlar imzalayıb
Bakı, 3 aprel, AZƏRTAC
Qazaxıstan Prezidenti Kasım-Jomart Tokayev Murat Nurtleunu xarici işlər naziri təyin edib.
AZƏRTAC xəbər verir ki, 47 yaşlı Murat Nurtleu 2022-ci ilin yanvar ayından prezident administrasiyasına rəhbərlik edib. Müxtəlif illərdə Milli Təhlükəsizlik Komitəsi sədrinin birinci müavini və prezident administrasiyası rəhbərinin müavini vəzifəsində çalışıb.
Eyni zamanda, Ruslan Jaksılıkov yenidən müdafiə naziri, Marat Əhmədcanov isə daxili işlər naziri postlarına təyin edilib. 57 yaşlı Ruslan Jaksılıkov 2022-ci ilin yanvarından Müdafiə Nazirliyinə rəhbərlik edir, 58 yaşlı Marat Əhmədcanov isə həmin ilin fevral ayından daxili işlər naziri postunda çalışır.
Xatırladaq ki, martın 19-da Qazaxıstan Məclisinə (parlamentin aşağı palatası) seçkilər keçirilib. Martın 29-da Kasım-Jomart Tokayev hökumətə Nazirlər Kabinetinin yeni heyəti təyin olunana qədər vəzifələrinin icrasını davam etdirməyi tapşırıb. Martın 30-da Əlixan Smayılov Qazaxıstanın Baş nazir postuna təyin olunub.
Bölmənin digər xəbərləri
