Qırğızıstanın AKİpress agentliyi 15 İyun - Milli Qurtuluş Günü haqqında yazır
Bişkek, 16 iyun, AZƏRTAC
Azərbaycanın Qırğızıstandakı səfirliyinin təşəbbüsü ilə Bişkekdəki AKİpress agentliyi 15 İyun - Milli Qurtuluş Günü ilə bağlı məqalələr yayıb.
Məqalələrdə bildirilir ki, Azərbaycan müstəqilliyini 1991-ci il oktyabrın 18-də bərpa edib. Lakin müstəqilliyin ilk illərində ölkədə böhran yaranmışdı, Ermənistanın Azərbaycana qarşı apardığı işğalçılıq siyasəti getdikcə güclənirdi.
Qeyd edilir ki, 1993-cü il iyun ayının 15-də xalqın təkidli tələbi ilə Heydər Əliyev Azərbaycan Ali Sovetinin sədri, həmin il oktyabr ayının 3-də isə ölkə Prezidenti seçilib. Beləliklə, 15 iyun tariximizə Milli Qurtuluş Günü kimi daxil olub. Azərbaycan Respublikasının Milli Məclisi 1997-ci ilin iyununda bu günü bayram elan edib.
Vurğulanır ki, Ümummilli Liderin qətiyyəti xalqa ruh yüksəkliyi gətirib, inamını özünə qaytarıb, sabitlik və əmin-amanlıq yaradıb. Heydər Əliyevin Azərbaycana rəhbərlik etdiyi dövrdə milli mənəvi dəyərlər bərpa edilib. Ulu Öndərin qətiyyəti, apardığı uğurlu daxili və xarici siyasət sayəsində ölkə xaosdan xilas olub, demokratik inkişaf yolu ilə inamla irəliləyərək böyük nailiyyətlər qazanıb. Heydər Əliyev öz gücünə, təcrübəsinə güvənən dahi siyasətçi kimi söylədiyi “Azərbaycanın dövlət müstəqilliyi əbədidir, sarsılmazdır, dönməzdir” kəlamına sadiq qaldığını sübut edib.
Bildirilir ki, hələ 1993-cü ildə BMT Təhlükəsizlik Şurası Azərbaycan Respublikasının ərazi bütövlüyünü, suverenliyini dəstəkləyən, Ermənistan silahlı qüvvələrinin Azərbaycanın işğal edilmiş ərazilərindən qeyd-şərtsiz çıxarılması ilə bağlı dörd qətnamə qəbul edib. Təəssüf ki, bu günədək bu nüfuzlu beynəlxalq təşkilatın sənədləri Ermənistan tərəfindən icra olunmur.
Diqqətə çatdırılır ki, Heydər Əliyev türkdilli ölkələrlə qardaşlıq münasibətlərinin yaranması üçün böyük işlər görüb. Mərkəzi Asiya və Qırğızıstanla qarşılıqlı əməkdaşlığın inkişafı Heydər Əliyevin xarici siyasətinin prioritet istiqamətlərindən biri idi. Heydər Əliyev deyirdi: “Bizim xalqlarımız qardaşdır və “Manas” dastanı bizim ümumi dilimizdə yazılıb”.
Qulu Kəngərli
AZƏRTAC-ın xüsusi müxbiri
Bişkek
Bölmənin digər xəbərləri
