“QIZIL KÜRƏ” BEYNƏLXALQ MÜKAFATININ TƏQDİMAT MƏRASİMİ İLƏ ƏLAQƏDAR MƏTBUAT KONFRANSI KEÇİRİLMİŞDİR
Mərkəzin icraçı direktoru, mükafatın təşkilat komitəsinin sədri Zahir Əzəmət, təşkilatın həmsədrləri Anar Afətbəyli və Allahyar Eyyubov cari ilin iyununda təsis edilmiş QASİM haqqında qısa məlumat vermişlər. Bildirilmişdir ki, qurumun məqsədi Azərbaycanı çağdaş dünya standartlarına uyğunlaşdırmaq istiqamətində layihələr, proqramlar hazırlamaq, araşdırmalar aparmaqdır. QASİM-də Azərbaycan, Türkiyə, Fransa, Almaniya və İngiltərədə, eləcə də ABŞ və Kanadada təhsil almış 50-dən çox mütəxəssis çalışır.
Mərasimdə “Qızıl kürə” mükafatının Azərbaycan cəmiyyətində qloballaşma ideyasını populyarlaşdırmaq, respublikamızı dünyaya yaxınlaşdıran rəsmi və ictimai qurumları, o cümlədən, elm, mədəniyyət, siyasət adamlarını və ictimai xadimləri dəyərləndirmək məqsədilə təsis olunduğu, mükafatın 10 sahə ( mədəniyyət, elm və təhsil, iqtisadiyyat, siyasət, insan haqları və hüquq, informasiya və texnologiya, KİV və nəşriyyat, qabaqcıl ideyaların himayəsi və s.), 15 nominasiya üzrə ildə bir dəfə - dekabrın sonunda təqdim ediləcəyi diqqətə çatdırılmışdır. Mükafatın qaliblərə dekabrın 28-də Bakı Caz Mərkəzində (Rəşid Behbudov küç. 19) təqdim ediləcəyi bildirilmişdir.
