Qoşulmama Hərəkatı Gənclər Təşkilatının Tədqiqat Mərkəzi tərəfindən dəyirmi masa təşkil edilib
Bakı, 7 mart, AZƏRTAC
Martın 6-da Qoşulmama Hərəkatı Gənclər Təşkilatının (QHGT) Tədqiqat Mərkəzi tərəfindən dəyirmi masa təşkil edilib.
Bu barədə AZƏRTAC-a təşkilatın mətbuat xidmətindən məlumat verilib. Bildirilib ki, tədbir QHGT-nin Tədqiqat Mərkəzini və onun Təqaüd Proqramını təqdim etmək, həmçinin innovativ tədqiqat ideyalarının müzakirə və mübadiləsi üçün Qoşulmama Hərəkatına üzv dövlətlərdən olan gənc tədqiqatçıları və mövzu üzrə ekspertləri bir araya gətirmək məqsədi daşıyır.
Tədbiri QHGT-nin Beynəlxalq Əlaqələr və Tədqiqat Mərkəzi üzrə koordinatoru Səma Bağırova açıb. Sonra COP29-un baş danışıqçısı və Azərbaycan Respublikasının xarici işlər nazirinin müavini Yalçın Rəfiyev çıxış ediblər. Nazir müavini QHGT-nin Tədqiqat Mərkəzinin Qoşulmama Hərəkatı gənclərinin qlobal miqyaslı elmi tədqiqatlar həyata keçirmələri üçün vacib platforma olduğunu vurğulayıb.
Tədqiqat Mərkəzinin Qoşulmama Hərəkatından olan gənc təqaüdçülərin ərsəyə gətirdiyi 2 məqalənin və tədqiqat təklifinin təqdimatı, həmçinin müzakirəsi də baş tutub. Azərbaycanın COP29-a sədrliyini nəzərə alaraq, Mərkəz 2024-2025-ci illəri hazırda diqqət mərkəzində olan iqlim fəaliyyəti mövzusuna həsr edib.
Tədbir COP29-un iqlim üzrə gənclər çempionu və QHGT-nin sədri Leyla Həsənovanın çıxışı ilə yekunlaşıb. L.Həsənova QHGT-nin Tədqiqat Mərkəzinin tənqidi müzakirə və nəsillərarası dialoq üçün münbit mühit formalaşdırmaqla bərabər, gənc alimlərin qlobal elmi tədqiqatlara töhfə verməsi üçün şərait yaradacağını vurğulayıb.
Bölmənin digər xəbərləri
