Qurban Qurbanov: Bu il qol baxımdan məhsuldarlıq yuxarıdırsa, deməli, işləri düzgün görmüşük
Bakı, 5 may, Nicat Məmmədov, AZƏRTAC
Futbolçularımızı, azarkeş və rəhbərliyimizi təbrik edirəm. Titul üçün hər komanda, hər məşqçi çalışır. Titulu qoruduğumuz üçün oyunçulara təşəkkür edirəm.
AZƏRTAC xəbər verir ki, bu sözləri “Qarabağ” klubunun baş məşqçisi Qurban Qurbanov Topaz Premyer Liqasının 27-ci turunda “Səbail”lə görüşdən sonra təşkil olunmuş mətbuat konfransında deyib.
Təcrübəli mütəxəssis ilk dəfə avrokuboka vəsiqə qazanan “Səbail”i təbrik edib. O, paytaxt təmsilçisinin qısa zamanda çox iş gördüklərini deyib.
Baş məşqçi deyib ki, sonuncu tura formal yanaşmayacaqlar: “Ola bilər ki, heyətdə hansısa dəyişikliklər olacaq. Ancaq yenə də öz oyunumuzu oynamağa çalışacağıq. Hər bir futbolçu bizim üçün dəyərlidir. Ancaq bəziləri ilə yollar ayrılmalıdır və onların sayı çox deyil. Yeni futbolçularla bağlı axtarışımız gedir. Hələ Reynaldo barədə də qərar verməmişik. Bu üzdən onun “Neftçi”yə və ya başqa kluba keçmə ehtimalı barədə nəsə deyə bilmərəm”.
Q.Qurbanovun sözlərinə görə, bu mövsümdəki çempionluq bir qədər çətin olub: “Hələlik UEFA Çempionlar Liqasında düşünmürük. “Neftçi” də çempion olmağa istəkli idi. Həmişə istəmişəm ki, komandalarımız güclü olsun, yeni sponsorlar gəlsin. Bu il qol baxımdan məhsuldarlıq yuxarıdırsa, deməli, işləri düzgün görmüşük”.
Baş məşqçi vaxtı ilə rəhbərliyi altında çıxış edən veteran futbolçular - hazırda “Sumqayıt”a rəhbərlik edən Ayxan Abbasov və “Səbail”in baş məşqçisi Aftandil Hacıyev barəsində də fikirlərini bölüşüb: "Hər ikisi futbolçularım olub. Onların işə yanaşmasından razı qalmışam. İndiki uğurları əziyyətlərinin bəhrəsidir”.
Qurban Qurbanov kapitan Rəşad Sadıqov barədə də fikir bildirib: “Rəşad “Qarabağ” üçün böyük qüvvə, kapitandır. Nə qədər dəyərli olduğunu göstərdi. Hələ gücü var”.
Bölmənin digər xəbərləri
