Qusarda qanunsuz ağac kəsintisinə görə müvafiq tədbir görülmüşdür
Bakı, 19 mart (AZƏRTAC). Ekologiya və Təbii Sərvətlər Nazirliyinə Qusar Meşə Mühafizəsi və Bərpası Müəssisəsinin (MMBM) ərazisində ağacların kəsilməsi barədə daxil olmuş şikayət məktubunda göstərilənlərin yoxlanması məqsədilə Nazirliyin və aidiyyəti tabeli qurumlarının əməkdaşlarından təşkil olunmuş Komissiya tərəfindən yerində araşdırma aparılmışdır.
Ekologiya və Təbii Sərvətlər Nazirliyindən AZƏRTAC-a bildirmişlər ki, komissiyanın apardığı araşdırma zamanı Qusar MMBM-in Qusar və Hil meşəbəyliklərinin dolaylarında, ümumilikdə 34,54 m3 həcmində 150,77 manat köküstə nırx dəyərində 73 ədəd ağacın qanunsuz kəsilməsi faktı aşkar edilmişdir. Bununla əlaqədar meşə fonduna dəymiş ziyan ərazilərə cavabdeh meşə gözətçiləri tərəfindən ödənilmiş, Qusar MMBM-in direktoru barədə isə müvafiq təşkilati tədbir görülmüşdür.
Komissiya tərəfindən keçirilən araşdırmadan 3 gün əvvəl isə Qusar Meşə Mühafizəsi və Bərpası Müəssisəsinin əməkdaşları tərəfindən xidməti ərazilərində mühafizə vəziyyətinə baxış keçirilən zaman 0,79 m3 həcmində 56,14 manat köküstə nırx dəyərində 14 ədəd şam ağacını qanunsuz kəsdiyinə görə təqsirkar şəxs Qusar rayon Urva kənd sakini Valerik Əhmədov barəsində akt və protokol tərtib edilərək inzibati qaydada 700 manat məbləğində cərimə olunmuşdur. Meşə fonduna dəymiş ziyanın ödənilməsinin təmin edilməsi üçün sənədlər Qusar rayon məhkəməsinə göndərilmişdir.
Bölmənin digər xəbərləri
