Regionda sabitliyin pozulması məsələsində Ermənistan tək deyil - ŞƏRH
Bakı, 8 sentyabr, AZƏRTAC
Ermənistanın ötən ilin sentyabr ayında törətdiyi genişmiqyaslı təxribatları fonunda son günlər mütəmadi şəkildə atəşkəsi pozması faktiki olaraq danışıqları dalana dirəyib. Paralel olaraq Ermənistanın təxribatları siyasi müstəvidə də pik həddə çatıb. Baxmayaraq ki, ABŞ-ın və Avropa İttifaqının (Aİ) görüş təşəbbüsləri və mövcud razılaşmaları Ermənistan tərəfindən hər zaman sabotaj olunub. Ancaq ümumi bir tendensiya belə idi ki, hərbi təxribatlar daha öncə iki ölkə başçılarının və ya XİN rəhbərlərinin görüşləri öncəsi və müzakirələri nəzərdə tutulan günlər həyata keçirilirdi. Son həftələr isə Ermənistan aktiv tərzdə, demək olar ki, hər gün hərbi təxribata əl atır. Buna paralel olaraq isə erməni lobbisi bütün dünyada ölkəmiz əleyhinə informasiya müharibəsini genişləndirib.
Bu sözləri AZƏRTAC-a açıqlamasında Gənc Demokratlar İnstitutu İctimai Birliyinin sədri, politoloq Yeganə Hacıyeva söyləyib.
Politoloqun sözlərinə görə, “Xankəndidə çətin humanitar vəziyyət”, “blokada”, yalançı soyqırımı kimi informasiya təxribatları, dezinformasiyalar erməni lobbisi və havadarları tərəfindən ABŞ-ın və Avropanın qlobal yayım təsisatlarından bütün dünyaya tirajlanır. Bu gün Qərb media təsisatları Ermənistanın yalançı blokada və soyqırımı tezisləri ilə medianın geniş alətlərindən və ictimai institutların imkanlarından istifadə edərək iki ölkə arasında düşmənçiliyin qızışdırılmasında iştirak edirlər. Artıq bir neçə aydır davam edən bu qlobal yalan təbliğatı sovetlər dövründə soyuq müharibənin bütün elementlərini özündə cəmləyərək hərbi məqsədlərə xidmət edən xüsusiyyətlərə malikdir. İstər rəsmi İrəvanın, istərsə də erməni lobbisinin və havadarlarının Qərb mediasında məqsədyönlü formada yalan məlumatlar yayması mərkəzləşdirilmiş şəkildə həyata keçirilən informasiya təxribatıdır.
“Diplomatik təzyiqlər haqqında danışırıqsa, Azərbaycan “Laçın” dövlət sərhədindən buraxılış məntəqəsini yaratmaqla öz sərhədlərinə nəzarəti gücləndirdi və erməni təxribatlarının qarşısını aldı. Ölkəmizin bu fəaliyyətini əhəmiyyətsiz göstərmək üçün Ermənistan və havadarları “humanitar yük” adı ilə Azərbaycanın suveren ərazisinə TIR karvanları göndərərək öz məqsədlərinə çatmaq istəyirlər. Bundan əlavə, Ermənistan rəsmiləri və onların Fransa kimi havadarları belə diplomatik təxribatlarla prosesi erməni maraqları naminə dəyişilə biləcəyi mesajlarını səsləndirirlər. Bunu ona görə diplomatik təxribat adlandırırıq ki, diplomatiya başqa ölkədəki həmkara istiqamətlənmiş və proseslərin həllinə hədəflənmiş rabitədir. Lakin nümunə üçün Fransanın addımları prosesin həllinə töhfə verəcək addımlar deyil, erməni ictimaiyyətinin ideoloji ruhlanmasına ünvanlanan monoloqlardır.
Azərbaycanın cavab reaksiyasına hesablanan bu hərbi təxribatlar isə qısamüddətli və uzunmüddətli məqsədlərə hesablanıb. Bu cür təxribatlarla göstərməyə çalışılır ki, 44 günlük Vətən müharibəsindən sonra Azərbaycanın Orta Dəhlizlə bağlı təklifləri aktual deyil və regionda təhlükə mövcuddur. Şimal-Cənub nəqliyyat dəhlizi isə Rusiya-Ukrayna müharibəsi, eyni zamanda, İranın nüvə ambisiyaları və son dövrlər qonşularına münasibətində təcavüz siyasətinin nəticəsi olaraq arzuolunmazdır. Bu halda isə Cənubi Qafqazdan keçən və Azərbaycanın regionun stabilliyi üçün formalaşdırdığı Orta Dəhliz təklifi xüsusilə diqqəti çəkir. Bütün bunların fonunda artıq Cənubi Qafqazda sabitlik sadəcə regionun yox, bütövlükdə Avrasiyanın təhlükəsizliyinin vacib elementi kimi qəbul edilə bilər”, - deyə Y.Hacıyeva vurğulayıb.
O əlavə edib ki, regionda sabitliyin pozulması məsələsində Ermənistan tək deyil, proseslərin gözlə görünən və görünməyən oyunçuları var. Bütün bunları nəzərə alan Azərbaycan daxildə və sərhəd bölgəsində təhlükəsizliyi təmin etmək üçün lazımi addımları atır. Bu da ölkəmizin beynəlxalq hüquqla təsbit olunmuş legitim haqqıdır. Ona görə də Ermənistanın istənilən hərbi təxribatlarının, törətdiyi eskalasiyalarının cavabı adekvat şəkildə verilir və veriləcək.
Bölmənin digər xəbərləri
