REJİSSOR MUSTAFA AKKAD EKSTREMİSTLƏRİN QURBANI OLMUŞDUR
Dünya kinematoqrafının 75 yaşlı ustadının həyatı üç gün əvvəl Əmmanda sona çatmışdır. “Qrand Hyatt” mehmanxanasında törədilən partlayış nəticəsində ağır yaralanan rejissor, onu İordaniya səfərində müşayiət edən sevimli qızı, 3 uşaq anası, 34 yaşlı Rimmanın həlak olduğunu eşidəndən sonra ürəktutmasından keçinmişdir.
Akkad Hollivudda Con Karpenterlə birlikdə “Hellouin” silsiləsindən bir sıra dəhşət filmləri çəkmişdir. Lakin suriyalının özünü trillerlərə həsr etmək niyyəti olmamışdır. O, İslamı tərənnüm edən gözəl filmlər çəkməzdən əvvəl, sanki, Qərbin mənəvi süqutunu göstərmişdir.
Nəcib müsəlman obrazı əvvəlcə “Müraciət” (1977-ci il), sonra isə “Səhra şirləri” (yaxud “Ömər Muxtar”, 1981-ci il) filmlərində yaradılmışdır. Lakin Akkad həyatının ən böyük arzusunu - orta əsrlərdə səlibçilərin qoşunlarını darmadağın etmiş sərkərdə Səlahəddin əl-Əyyubinin igidlikləri barədə film çəkmək arzusunu gerçəkləşdirə bilmədi.
İslamın əsil simasını müdafiə edən Mustafa Akkad taleyin amansız hökmü ilə ekstremist qüvvələrin qurbanı oldu. Heç kəs güman edə bilməzdi ki, Yaxın Şərqdə yeganə “əmin-amanlıq vahəsi” olan İordaniyaya yollanan Suriya xalqının böyük oğlu burada öz ölümünü tapacaqdır.
Bölmənin digər xəbərləri
