RESPUBLİKAMIZIN ŞİMAL BÖLGƏSİNDƏ HAVA ŞƏRAİTİ KƏSKİN SURƏTDƏ PİSLƏŞMİŞDİR
Şəxsi təsərrüfatlara, evlərə, məktəb binalarına və bir sıra ictimai obyektlərə zərər dəymişdir. Baş verə biləcək mənfi halların qarşısını almaq məqsədi ilə Xaçmaz, Quba, Qusar rayonlarında elektrik enerjisinin verilməsi müvəqqəti olaraq kəsilmişdir.
Qasırğa Quba rayonuna daha çox zərər vurmuşdur. Rayonda bir neçə məktəbin dam örtüyü dağılmışdır. Alekseyevka kəndinin sakini Sara Qafarovanın fərdi evinin damına iri çinar ağacı düşmüş, xoşbəxtlikdən, insan tələfatı olmamışdır. Külək bir neçə yaşayış evinin də dam örtüyünü aparmış, köhnə elektrik xətləri sıradan çıxmışdır. Rayonun meşə ərazisində yanğın baş vermişdir. Rayon icra hakimiyyəti nəzdində fəaliyyət göstərən fövqəladə hallar komissiyasının, rayon meşə mühafizəsi və bərpası müəssisəsinin əməkdaşları yanğının qarşısının alınmasına cəlb olunmuşlar. Meşə yanğınının qarşısını almaq üçün tədbirlər görülür.
Eyni vəziyyət Qusar rayonunda da baş vermişdir. Hazırda rayon fövqəladə hallar komissiyasında dəymiş zərərin həcmi müəyyənləşdirilir. İlkin məlumatlara görə, bir neçə məktəbə və digər ictimai obyektlərə ciddi zərər dəymişdir.
Havaların kəskin surətdə dəyişməsi və qasırğa Xaçmazın sosial-iqtisadi həyatında ciddi problem yaratmamışdır.
