Rüfət Mahmud: “Turan ruhu” kolleksiyasının seçilmiş nümunələri beynəlxalq səviyyədə tanıdılacaq
Bakı, 13 fevral, Günel Alıyeva, foto Səfiyar Məcnun, AZƏRTAC
Bu gün “İçərişəhər” Dövlət Tarix-Memarlıq Qoruğu İdarəsinin nəzdində fəaliyyət göstərən Ənənəvi İncəsənət Mərkəzinin yeni kolleksiyası təqdim edilib. “Turan ruhu” adlanan bu kolleksiya Mərkəzin 6-cı kolleksiyasıdır. Kolleksiyada keramika, zinət əşyaları, batika və digər ənənəvi sənət nümunələri yer alır.
AZƏRTAC xəbər verir ki, bu fikirləri jurnalistlərə açıqlamasında “İçərişəhər” Dövlət Tarix-Memarlıq Qoruğu İdarəsinin İdarə Heyətinin sədri Rüfət Mahmud səsləndirib.
Onun sözlərinə görə, tədbir çərçivəsində “Dastan” brendinin yenidən istifadəyə verilməsi də təqdim olunub.
“Bu məkan sənətkarlara öz əl işlərini birbaşa ziyarətçilərə təqdim etmək imkanı yaradır və beləliklə, sənəti insanlara daha da yaxınlaşdırır”, – deyə sədr əlavə edib.
R.Mahmud bildirib ki, hazırda Ənənəvi İncəsənət Mərkəzinin strategiyası hazırlanır və bu istiqamətdə geniş perspektivlər mövcuddur. O, “Dastan” brendinin dünya miqyasında tanıdılmasının əsas məqsədlərdən biri olduğunu vurğulayaraq qeyd edib ki, “Turan ruhu” kolleksiyası türk dövlətlərində də təqdim olunacaq. Kolleksiyanın seçilmiş nümunələrinin müvafiq ölkələrə göndərilməsi və beynəlxalq səviyyədə tanıdılması nəzərdə tutulur.
Bölmənin digər xəbərləri
