RUSİYA FEDERASİYA ŞURASI SƏRHƏDYANI ƏMƏKDAŞLIQ HAQQINDA QANUN HAZIRLAYIR

19.07.2004 [19:22]
Çap et
A⁺ A^-

RF Federasiya Şurasının MDB İşləri Komitəsi sədrinin birinci müavini, Rusiya-Azərbaycan parlamentlərarası komissiyasının başçısı Konstantin Markelov AZƏRTAC-ın xüsusi müxbirinə bildirmişdir ki, son bir-iki ildə Azərbaycanın və Rusiyanın parlamentləri arasında əlaqələr fəallaşmış və kifayət qədər konstruktiv olmuşdur, ümdə məsələlərlə bağlı bir sıra istiqamətlər üzrə işçi qrupları yaradılmışdır. K.Markelov sərhədyanı əməkdaşlığı və xüsusi xidmət idarələrinin – sərhəd, gömrük, elektron xidməti idarələrinin sərhəddə fəaliyyətini belə məsələlərdən adlandırmışdır. O qeyd etmişdir ki, Azərbaycan parlamentinin üzvləri ilə sərhədyanı bölgələrə birgə səfər və yerlərdə vəziyyətin öyrənilməsi nəticəsində hər iki tərəfin vətəndaşları, sahibkarları çoxlu irad bildirmişlər. Beləliklə, hər iki tərəf sərhədyanı bölgələrdə görülən işi qeyri-qənaətbəxş iş kimi səciyyələndirmişdir.

K.Markelov demişdir ki, bunu nəzərə alaraq, hazırda RF Federasiya Şurasında sərhədyanı əməkdaşlıq haqqında qanun layihəsi müzakirə edilir və baxılmaq üçün yaxın vaxtlarda Dövlət Dumasına veriləcəkdir. Bu qanun, ilk növbədə, MDB vətəndaşlarına aiddir. Qanunda Rusiyanın sərhədyanı bölgələrinin statusu müəyyənləşdiriləcək, sərhədyanı əməkdaşlığın sadələşdirilməsi, sərhədyanı ərazilərdə yaşayan əhalinin qarşılıqlı fəaliyyəti ilə bağlı bir sıra tədbirlər nəzərdə tutulur. Qanunda sərhədyanı bölgə statusu anlayışı müəyyənləşdirilir.

K.Markelov demişdir: “Belə bir qanunun qəbul edilməsinin zəruriliyi həmdə onunla əlaqədardır ki, bizi mədəni, iqtisadi, insani əlaqələr bağlayır. Bundan başqa, sərhədyanı ticarət münasibətlərimizdə çox mühüm rol oynayır və o, həm Rusiyaya, həm də Azərbaycana xeyli iqtisadi fayda gətirə bilər. Bu, iqtisadi əməkdaşlığımızın inkişafında atılan addımlardan biridir. Axı, prezidentlərimiz qarşımıza mühüm vəzifələr – ölkələrimiz arasında əmtəə dövriyyəsini genişləndirmək vəzifələri qoymuşlar”.

RUSİYA FEDERASİYA ŞURASI SƏRHƏDYANI ƏMƏKDAŞLIQ HAQQINDA QANUN HAZIRLAYIR

MÜƏLLİFLƏ ƏLAQƏ

Bölmənin digər xəbərləri