Rusiya XİN Qarabağla bağlı üçtərəfli razılaşmaların ildönümü ilə əlaqədar bəyanatla çıxış edib
Moskva, 9 noyabr, AZƏRTAC
Rusiya Federasiyası Xarici İşlər Nazirliyi Rusiya, Azərbaycan və Ermənistan liderləri arasında Qarabağla bağlı üçtərəfli razılaşmalarının ildönümü ilə əlaqədar bəyanatla çıxış edib.
AZƏRTAC xəbər verir ki, bəyanatda 2021-ci il noyabrın 10-da Rusiya Federasiyasının Prezidenti Vladimir Putin, Azərbaycan Respublikasının Prezidenti İlham Əliyev və Ermənistan Respublikasının baş naziri Nikol Paşinyan tərəfindən Qarabağ münaqişəsi zonasında atəşin və bütün hərbi əməliyyatların tam dayandırılması ilə bağlı Bəyanatın qəbul edilməsindən bir il ötdüyü qeyd olunur. Bu addım qan tökülməsinə son qoymağa və bölgədə dinc həyatın bərqərar olması prosesinə başlamağa imkan verdi.
“Bu gün deyə bilərik ki, 2020-ci il 10 noyabr tarixli Bəyanatda təsbit olunan razılaşmalar ümumilikdə icra olunur. Eyni zamanda, Bakı və İrəvanın onun bütün müddəalarının gələcəkdə də həyata keçirilməsinə və onlara ciddi şəkildə riayət edilməsinə sadiq qalmaları çox vacibdir. Bəyanata uyğun olaraq bölgəyə yerləşdirilən Rusiya sülhməramlı kontingenti (RSK) regionda vəziyyətin sabitləşməsinə və təhlükəsizliyin təmin edilməsinə mühüm töhfə verir”, - deyə vurğulanan sənəddə qeyd olunur ki, Azərbaycan və Ermənistan bunu yüksək qiymətləndirir.
Rusiya XİN qeyd edir ki, dekabrın 2-dən Rusiya sülhməramlılarının iştirakı ilə ümumilikdə 122 hərbi əsir və saxlanılan şəxs geri qaytarılıb. Onlardan 105-i Ermənistana, 17-si isə Azərbaycana qaytarılıb. Öz növbəsində üç mina sahəsinin xəritələr paketi Azərbaycan tərəfinə təhvil verilib.
“Biz tərəfdaşlarımızla birlikdə Rusiya, Azərbaycan və Ermənistan liderlərinin 2021-ci il 11 yanvar tarixli Bəyanatında təsbit olunmuş Cənubi Qafqazda bütün iqtisadi və nəqliyyat əlaqələrinin açılması üzrə vəzifələri ardıcıl şəkildə həyata keçirmək niyyətindəyik. Biz Rusiya Federasiyasının, Azərbaycan Respublikasının və Ermənistan Respublikasının Baş nazirlərinin müavinlərinin həmsədrliyi ilə Üçtərəfli İşçi Qrupun fəaliyyətini yüksək qiymətləndiririk. Biz Cənubi Qafqazın iqtisadi və nəqliyyat potensialının üzə çıxarılmasına kömək edəcək maraqlar balansına əsaslanan konkret layihələrin tezliklə işə salınmasının zəruriliyini vurğulayırıq.
Azərbaycan-Ermənistan dövlət sərhədində gərginliyin azaldılması, sonrakı demarkasiyası ilə onun delimitasiyası prosesinə tezliklə başlanılmasının vacibliyini qeyd edirik. Biz bütün lazımi məsləhət yardımını göstərməyə hazırıq”, - deyə məlumatda qeyd olunur.
Rusiya Xarici İşlər Nazirliyi ATƏT-in Minsk qrupu həmsədrlərinin xətti ilə, ilk növbədə, regionun qarşısında duran sosial-iqtisadi və humanitar məsələlərin həlli kontekstində səylərinin davam etdirməsinin vacibliyini, həmçinin Beynəlxalq Qızıl Xaç Komitəsi, BMT-nin Qaçqınlar üzrə Ali Komissarlığı, UNESCO və digər müvafiq beynəlxalq təşkilatların töhfəsinin aktuallığını qeyd edib.
Sənəddə, eyni zamanda, vurğulanır: “Biz Azərbaycan Respublikası ilə Ermənistan Respublikası arasında münasibətlərin normallaşmasına kömək etmək üçün əlimizdən gələni edəcəyik, Cənubi Qafqazın sabitliyinin, təhlükəsizliyinin və iqtisadi inkişafın təmin edilməsinə dair geniş spektrli məsələlər üzrə bütün səviyyələrdə təmasların genişləndirilməsinə yönəlmiş sülh təşəbbüslərini dəstəkləyəcəyik. Biz, həmçinin Azərbaycan və erməni xalqları arasında etimad mühitinin yaradılması məqsədilə Rusiya Federasiyasının iştirakı ilə Azərbaycan Respublikası və Ermənistan Respublikası ictimaiyyətinin nümayəndələri arasında dialoqun aparılmasına kömək etməyə hazırıq. Biz Cənubi Qafqaz ölkələri ilə onların qonşuları arasında mehriban qonşuluq münasibətlərinin qurulmasının, qarşılıqlı faydalı regional əməkdaşlığın inkişafının tərəfdarıyıq”.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
