RUSİYADAKI HƏMVƏTƏNLƏRİMİZ SOYQIRIM QURBANLARININ XATİRƏSİNİ ANMIŞLAR
Martın 31-də Ümumrusiya Azərbaycan Konqresi azərbaycanlıların soyqırımı gününə həsr olunmuş yığıncaq keçirmişdir. Yığıncaqda Azərbaycan diasporunun və ölkəmizin Rusiyadakı səfirliyinin nümayəndələri iştirak etmişlər. Çıxış edənlər Azərbaycan Prezidenti Heydər Əliyevin 1998-ci il 26 mart tarixli Fərmanını yüksək qiymətləndirmiş, xalqımızın tarixi yaddaşını möhkəmləndirmək, erməni daşnaklarının törətdikləri dəhşətli cinayətlər barədə həqiqəti dünya ictimaiyyətinə çatdırmağın zəruriliyini vurğulamışlar. Natiqlər Ermənistan-Azərbaycan, Dağlıq Qarabağ münaqişəsinin səbəb və nəticələrindən də ətraflı danışmış, nəhayət, problemin sülh yolu ilə həll ediləcəyinə ümidvar olduqlarını bildirmişlər.
Ümumrusiya Azərbaycan Konqresinin icraçı direktoru Zeynal Nağdəliyev azərbaycanlıların soyqırımı və deportasiyası haqqında doğru-düzgün informasiyanın yayılması məsələsinə toxunaraq demişdir ki, Konqres tariximizin ayrı-ayrı səhifələrindən bəhs edən kitabçalar buraxmaq, Azərbaycan diasporunun qəzetini nəşr etmək niyyətindədir. Rusiyanın digər ictimai təşkilatları ilə birgə Qarabağ münaqişəsinin dinc yolla həlli yönündə tədbirlər keçiriləcəkdir.
Asya Hacızadə
AZƏRTAC-ın xüsusi müxbiri
Moskva
Bölmənin digər xəbərləri
