REGİONLAR
Sabirabadda 5666 hektardan çox sahəyə çiyid səpilib
Sabirabad, 24 aprel, Mahir Babayev, AZƏRTAC
Sabirabad rayonunda çiyid səpini sürətlə davam edir. Ötən il 25 min 210 ton xam pambıq istehsal edən sabirdabadlı əkinçilər cari ildə 9 min 389 hektar sahədə pambıq əkməyi planlaşdırırlar. Bu qədər sahədə məhsul yetişdirmək üçün rayonda bütün lazımi tədbirlər vaxtında həyata keçirilib, müqavilə bağlanılmış məhsul istehsalçıları lazımi texnika, toxum və dərman preparatları ilə təmin olunub və digər köməkliklər göstərilib.
Rayon Dövlət Aqrar İnkişaf Mərkəzindən AZƏRTAC-ın bölgə müxbirinə bildirilib ki, səpin kampaniyasına mütəşəkkil başlayan əkinçilər qısa müddətdə 5666,9 hektar sahəyə toxum səpiblər. İşin yaxşı təşkili nəticəsində gün ərzində rayon üzrə ümumilikdə 300-350 hektar sahəyə çiyid səpilir. Səpin aparılmış sahənin 2156,7 hektarı “MKT” MMC-yə, 1990 hektarı “AZƏRPAMBIQ” MMC-yə, 255 hektarı “AQRO AZ” MMC-yə, 1265,2 hektarı isə “P-AQRO” MMC-yə məxsusdur. Məhsul istehsalçıları səpini vaxtında başa çatdırmaq üçün bütün imkanlardan səmərəli istifadə edirlər.