Şahdağ Milli Parkının inzibati bina kompleksinə baxış keçiriləcəkdir
Bakı, 3 oktyabr (AZƏRTAC). Şahdağ Milli Parkının yeni istifadəyə verilmiş inzibati bina kompleksinə oktyabrın 4-də Ekologiya və Təbii Sərvətlər Nazirliyinin, ictimaiyyətin və media nümayəndələrinin iştirakı ilə baxış keçiriləcəkdir.
Nazirliyin mətbuat xidmətindən AZƏRTAC-a bildirmişlər ki, Şahdağ Milli Parkının müasir standartlara cavab verən inzibati bina kompleksinin tikintisi Azərbaycan Respublikası Prezidentinin “Regionların sosial-iqtisadi inkişafı” Dövlət Proqramına uyğun olaraq reallaşmışdır. Kompleks inzibati binadan, ekoturizm mərkəzindən və yeni tikilmiş nəzarət-buraxılış məntəqələrindən ibarətdir.
İnzibati binada müasir tələblərə cavab verən iş otaqları, xüsusi təyinatlı otaq, kitabxana, konfrans zalı vardır. Ekoturizm mərkəzində vəhşi təbiətin canlı müşahidəsi, turistlərin məlumat almaları və bələdçi xidmətindən istifadə etmələri, turizm avadanlıqlarının icarəyə verilməsi üçün hər cür şərait yaradılmışdır. Nəzarət-buraxılış məntəqələri isə Qusar rayonunun Ləzə, Quba rayonunun Xınalıq, Şamaxı rayonunun Qələybuğur, İsmayıllı rayonunun Buynuz, Oğuz rayonunun Baş Daşağıl kəndlərində və Qəbələ rayonunun müvafiq dağlıq sahəsində inşa edilmişdir.
Bölmənin digər xəbərləri
