Salyan, 2 avqust , Aydın Yavərzadə, AZƏRTAC

Salyan Dövlət Rəsm Qalereyasında 2 avqust - Milli Kino Günündə “Art Kino” layihəsi təqdim edilib.

AZƏRTAC-ın bölgə müxbiri xəbər verir ki, təqdimat tədbirində rayon rəsmiləri, sənətçilər, mədəniyyət işçiləri iştirak ediblər.

Çıxış edən kinorejissor, Salyan Dövlət Rəsm Qalereyasının direktoru Kürçaylı Məmmədov Azərbaycan kinosunun yaranma tarixi və “Art Kino” layihəsi barədə geniş məlumat verib. Digər çıxış edənlər də milli kinomuzun keçdiyi inkişaf yolundan və Ulu Öndər Heydər Əliyevin kinomuza göstərdiyi misilsiz xidmətlərindən danışıblar.

Sonra kino rəssamı Elbəy Rzaquliyevin həyat və yaradıcılığına həsr olunan “Arzularını çəkən rəssam” bədii-sənədli filmi nümayiş olunub.

Qeyd edək ki, Salyan Dövlət Rəsm Qalereyasının təqdim etdiyi “Art Kino” layihəsi çərçivəsində müntəzəm olaraq rəssamlara həsr edilən filmlərin göstərilməsi, həmçinin səyyar nümayişlər nəzərdə tutulub.