Səbail rayonunda şəhid ailələri və Qarabağ müharibəsi əlilləri dövlət qayğısı ilə əhatə olunublar
Bakı, 5 mart, Səadət Hakıyeva, AZƏRTAC
Ölkəmizdə şəhid ailələrinin, Qarabağ müharibəsi veteranları və əlillərinin müdafiəsi dövlətin sosial siyasətin mühüm istiqamətlərindən birini təşkil edir. Aztəminatlı, ailə başçılarını itirən, eləcə də şəhid və qazi ailələri, xüsusi qayğıya ehtiyacı olanlar dövlətin diqqət və qayğısı ilə əhatə olunurlar. Bu, Prezident İlham Əliyevin bu ilin yanvar ayında imzaladığı “Yerli icra hakimiyyətləri haqqında Əsasnamə”nin təsdiq edilməsi barədə” Fərmana edilən dəyişiklikdə də öz əksini tapır. Fərmana uyğun olaraq, yerli icra hakimiyyəti orqanlarında “Vətən müharibəsi iştirakçıları və şəhid ailələri ilə işin təşkili şöbəsi” yaradılıb. Bu Fərman dövlətimizin başçısı İlham Əliyevin şəhid ailələri və müharibə iştirakçılarına göstərdiyi diqqət və qayğının nəticəsidir. Səbail rayonunda şəhid ailələri və müharibə veteranlarının problemləri daim diqqət mərkəzində saxlanılır, şəhid ailələri, qazilərlə ilə intensiv görüşlər təşkil olunur, onları maraqlandıran məsələlər diqqət mərkəzində saxlanılır.
AZƏRTAC xəbər verir ki, bu fikirləri Səbail Rayon İcra Hakimiyyətinin Vətən müharibəsi iştirakçıları və şəhid ailələri ilə işin təşkili şöbəsinin müdiri Orxan Aydınov bildirib.
Şöbə müdiri bildirib ki, torpaqlarımızın azadlığı uğrunda aparılan Vətən müharibəsi zamanı hərbi əməliyyatlarda Səbail rayonu 13 şəhid verib. Qeyd olunub ki, şəhidlərin hər birinin dəfn və yas mərasimləri təşkil olunub, bütün lazımi addımlar atılıb.
Vətən müharibəsinin iştirakçısı olan şöbə müdiri diqqətə çatdırıb ki, şəhid ailələrinin sosial-məişət şəraitinin yaxşılaşdırılması məqsədilə hər bir şəhid ailəsi mənzil növbəsinə götürülüb və müvafiq sənədlər Əmək və Əhalinin Sosial Müdafiəsi Nazirliyinə təqdim edilib. Şəhidlərimizin adlarının əbədiləşdirilməsi ilə əlaqədar müvafiq işlər görülüb və bununla bağlı aidiyyəti qurumlara müraciətlər olunub.
Şəhid ailələrinin və Qarabağ müharibəsi əlillərinin dövlət qayğısı ilə əhatə olunduğunu söyləyən Orxan Aydınov bildirib ki, əlamətdar günlərdə şəhid ailələri ziyarət olunur və onlara lazımi diqqət göstərilir.
“Azərbaycan Prezidentinin tapşırıq və fərmanlarını rəhbər tutaraq Vətən müharibəsi iştirakçıları və şəhid ailələri ilə işin təşkili şöbəsi gündəlik fəaliyyətində hər bir şəhid ailəsi, qazilər ilə intensiv iş aparır, şəhidlərin ailə üzvlərinin qaldırdığı məsələlər dinlənilir və həll olunur, onların sosial-məişət şəraitlərinin yaxşılaşdırılması istiqamətində addımlar atılır. Vətən müharibəsi qaziləri və iştirakçıları ilə mütəmadi olaraq görüşlər keçirilir, onların işlə təmin olunması məsələlərinin həllində yaxından köməklik göstərilir və aidiyyəti qurumlara müraciətlər olunur”, - deyə Orxan Aydınov vurğulayıb.
Bölmənin digər xəbərləri
