Bakı, 3 oktyabr, AZƏRTAC

Dövlət ehtiyatları bütün sahələrdə təhlükəsizliyin təmin edilməsində mühüm rol oynayır. Bu sahə ilə bağlı qanunvericiliyin təkmilləşdirilməsi zamandan və mövcud şəraitdən irəli gələn zərurətdir.

AZƏRTAC xəbər verir ki, bu fikirləri Dövlət Ehtiyatları Agentliyinin İdarə Heyətinin sədri Səbuhi Sadıqov oktyabrın 3-də keçirilən iclasında “Dövlət ehtiyatları haqqında” qanun layihəsinin müzakirəsi zamanı səsləndirib.

Ölkəmizdə dövlət ehtiyatları sahəsini tənzimləyən vahid normativ hüquqi aktın mövcud olmadığını diqqətə çatdıran Səbuhi Sadıqov bu sahə üzrə vahid konseptual yanaşmanın olmadığını qeyd edib.

Sənədin hazırlanmasında beynəlxalq təcrübədən istifadə edildiyini bildirən agentliyin sədri deyib: “Çalışdıq ki, bu sahəni dərindən araşdıraq və Azərbaycana uyğun bir model formalaşdıraq. Dövlət ehtiyatlarını 3 əsas istiqamətdə - strateji, səfərbərlik və fövqəladə blokda müəyyənləşdirdik”.

Onun sözlərinə görə, sənədin hazırlanmasında məqsəd tələb və təklif arasında, istehlak bazarında tarazlığı qorumaq, fövqəladə hallarda ehtiyatlardan düzgün istifadə olunmasını təmin etməkdir.