Bakı, 22 dekabr, AZƏRTAC

Azərbaycan Prezidenti İlham Əliyev ölkəmizdə idmanın inkişafını daim diqqət mərkəzində saxlayır. Ölkəmizdə idman sahəsi dövlət səviyyəsində daim diqqət mərkəzində olub. Məhz bu diqqətin nəticəsidir ki, Azərbaycan dünyada idman ölkəsi kimi böyük nüfuz qazanıb. Dövlətimiz idmanın kütləviliyi qədər, onun təmiz qalması və sağlam əsaslarda inkişafına da böyük diqqət yetirir. 2016-cı ildə Prezident İlham Əliyevin Fərmanı ilə Azərbaycan Milli Antidopinq Agentliyinin (AMADA) yaradılması da bu iradənin göstəricisidir. AMADA yarandığı dörd il ərzində ölkədə dopinq nəzarətini uğurla həyata keçirib.

AZƏRTAC xəbər verir ki, bunu AMADA-nın rəhbəri Şəfəq Hüseynli dekabrın 22-də cari ilin yekunlarına həsr olunmuş videokonfransda deyib.

Bu ilin antidopinq sahəsi üçün bir çox vacib hadisələrlə yadda qaldığını deyən Ş.Hüseynli bildirib ki, COVID-19 pandemiyası bu sahəyə də təsirini göstərib. AMADA fəaliyyətini pandemiyanın yaratdığı reallıqlar əsasında qurub. İl ərzində vacib məsələlərdən biri də 2021-ci ildən qüvvəyə minəcək yeni Ümumdünya Antidopinq Məcəlləsi ilə bağlı hazırlıq işləri olub. Yerli qanunvericiliyin məcəlləyə uyğunlaşdırılması üçün AMADA tərəfindən “İdmanda dopinq vasitələrindən və üsullarından istifadəyə qarşı mübarizə haqqında” Qanuna bir sıra dəyişikliklər layihəsi hazırlanıb.

Əldə olunan nailiyyətlər və yeniliklərdən danışan Ş.Hüseynli bildirib ki, il ərzində AMADA beynəlxalq səviyyədə əməkdaşlığını daha da genişləndirib. Belə ki, bu müddətdə Türkiyə və Kanada antidopinq təşkilatları ilə saziş imzalanıb. Bundan əlavə, Beynəlxalq Test Agentliyi ilə əldə olunan razılaşmaya əsasən, AMADA beynəlxalq dopinq nəzarəti inspektorları proqramına qoşulub.

AMADA-nın “Tokio-2020” Yay Olimpiya Oyunlarında təmsil olunacağını vurğulayan Ş.Hüseynli qurumun iki əməkdaşının Olimpiadada dopinq nəzarəti prosesində iştirak edəcəyini vurğulayıb: “İdmanda ədalətin bərpası və dürüst yarışan idmançıların hüquqlarının qorunması da diqqət mərkəzində olub. Antidopinq qayda pozuntusu törətmiş 6 idman növü üzrə 12 idmançının nəticələrinin ləğv edilməsi və medalların geri alınması barədə müvafiq respublika idman federasiyaları məlumatlandırılıb. Bu il idmançılardan ümumilikdə 1087 test nümunəsi götürülüb. Bunlardan 1012-si milli test proqramı çərçivəsində, 75-i isə beynəlxalq sifariş əsasında olub”.

Ş.Hüseynli qeyd edib ki, pandemiya ilə əlaqədar test nümunələrinin götürülməsi karantin qaydalarının tələblərinə tam riayət olunmaqla həyata keçirilib. Dopinq nəzarəti inspektorları mütəmadi olaraq COVID-19 testlərinə cəlb edilib. Həmçinin cari il ərzində ümumilikdə 24 antidopinq qayda pozuntusu işi üzrə araşdırma aparılıb. Həmin işlərin 11-i ilə bağlı qərarlar artıq qüvvəyə minib. On üç iş isə icraatdadır. Sözügedən 24 antidopinq qayda pozuntusu, ümumilikdə 11 idman növündə qeydə alınıb. Belə ki, boks idman növündə 4, ağır atletika, cüdo, taekvando və karate idman növlərində 3, velosiped və güləş idman növlərində 2, futbol, sambo, atletika, və paracüdo idman növlərinin hər birində isə 1 qayda pozuntusu qeydə alınıb.

AMADA-nın fəaliyyətində antidopinq sahəsində maarifləndirmə işinə də geniş yer verdiyini vurğulayan Agentliyin rəsmisi il ərzində karantin qaydaları çərçivəsində 21 seminarın keçirildiyini qeyd edib. Bildirib ki, təhsil və maarifləndirmə təbirləri çərçivəsində bu il ərzində ümumilikdə 43 vebinar keçirilib. İl ərzində AMADA əməkdaşları özləri də Ümumdünya Antidopinq Agentliyi, Beynəlxalq Test Agentliyi, Avropa Şurası və digər beynəlxalq təşkilatlar tərəfindən keçirilən 23 vebinarda iştirak ediblər. Hesabat dövründə AMADA tərəfindən iki tədqiqat layihəsinə start verib. Avropa Şurası tərəfindən dəstəklənən bu layihələr idmançının ədalət mühakiməsinə çıxışının səviyyəsinin və antidopinq təşkilatlarında gender bərabərliyinin təmin edilməsi səviyyəsinin araşdırılması ilə bağlı olub.

Ş.Hüseynli bildirib ki, cari il AMADA üçün beynəlxalq fəaliyyət baxımından da zəngin olub. İl ərzində ümumilikdə beynəlxalq səviyyəli 35 görüş keçirilib. Bunlar Ümumdünya Antidopinq Agentliyi, Avropa Şurası, UNESCO və digər beynəlxalq təşkilatlar çərçivəsində baş tutub.

“AMADA sosial məsuliyyət layihələrini də davam etdirib. Martda AMADA tərəfindən Koronavirusla Mübarizəyə Dəstək Fonduna 10 min manat vəsait köçürülüb. Bundan əlavə sosial məsuliyyət tədbirləri çərçivəsində qadın, uşaq sığınacağı ilə bağlı bir neçə aksiya həyata keçirilib. AMADA Vətən müharibəsindəki böyük zəfərimizə töhfə vermək üçün bir sıra addımlar atıb. Müharibə başladıqdan sonra AMADA tərəfindən Silahlı Qüvvələrə Yardım Fonduna 10 min manat vəsait köçürülüb. Bundan əlavə, Vətən müharibəsində döyüşlərdə yaralanan hərbçilərə kömək məqsədilə AMADA-nın əməkdaşları öz təşəbbüsləri ilə vəsait toplayaraq tibbi ləvazimatlar alıb və Müdafiə Nazirliyinin Tibb Baş İdarəsinə təhvil veriblər. Dekabrda AMADA-nın əməkdaşları “YAŞAT” Fonduna 15,5 min manat vəsait köçürüblər. Vətən müharibəsi zamanı Azərbaycanın haqlı mövqeyinin beynəlxalq ictimaiyyətə çatdırılmasına da xüsusi diqqət yetirilib. Bunu üçün ingilis və rus dillərində çoxlu sayda video və foto vizuallar hazırlanıb. Həmin materiallarda Vətən müharibəsi zamanı Ermənistanın hərbi cinayətləri, o cümlədən dinc əhaliyə qarşı törədilən vəhşiliklər ifşa edilib. Həmin materiallar vasitəsilə dünya ictimaiyyəti, o cümlədən AMADA-nın beynəlxalq tərəfdaşları ətraflı məlumatlandırılıb”, - deyə Ş.Hüseynli əlavə edib.

AMADA-nın direktoru bildirib ki, Yeni Antidopinq Qaydaları hazırlanıb və dekabrın 21-də təsdiq edilib. Burada bir sıra yeni anlayışlar var. Bundan əlavə, yeni antidopinq qaydalarında AMADA, idman federasiyaları və idmançıların yeni öhdəlik və vəzifələri əksini tapıb. Antidopinq qaydalarına 3 yeni anlayış daxil edilib. Bunlar milli səviyyəli idmançı, prioritet hesab edilən idman növləri, milli əhəmiyyətli yarış anlayışlarıdır. Bundan əlavə yeni test qrupu yaradılıb.

Yeni öhdəliklərin federasiya və idmançılarla bağlı olduğunu deyən Ş.Hüseynli qeyd edib ki, idmançılar idmanı tərk etmək, yaxud idmana qayıtmaq barədə qərar qəbul etdikdə bu barədə AMADA-nı rəsmi şəkildə məlumatlandırmalıdırlar. Federasiyalar isə üzvlükdən çıxarılan yaxud üzvlüyə qəbul edilən idmançılar, yarışlar və təlim məşq toplantılarının vaxtı ilə bağlı əvvəlcədən nəzərdə tutulan müddətdə AMADA-ya məlumat verməlidir. Bu öhdəliyin pozulması isə sanksiya ilə nəticələnə bilər. Bundan başqa, törədilən antidopinq hallarına görə də federasiyalar diskvalifikasiya edilə bilər. Əgər 12 ay ərzində bir federasiyanın üzvləri tərəfindən milli səviyyədə 6-dan çox, yaxud beynəlxalq səviyyədə 3-dən çox antidopinq qayda pozuntusu törədilərsə, həmin federasiya bir ilədək diskvalifikasiya edilə bilər.