Səfir: İslam Həmrəyliyi Oyunları müsəlman ölkələri arasında əlaqələrin möhkəmlənməsində mühüm rol oynayacaq
Bakı, 11 may, AZƏRTAC
Səudiyyə Ərəbistanının Azərbaycandakı səfiri Müsaid bin İbrahim əs-Süleym “Bakı-2017” IV İslam Həmrəyliyi Oyunları ilə bağlı AZƏRTAC-a məxsusi müsahibə verib. Müsahibəni təqdim edirik.
-Səudiyyə Ərəbistanının IV İslam Həmrəyliyi Oyunlarında hansı heyətlə təmsil olunması barədə nə deyə bilərsiniz?
-Səudiyyə Ərəbistanı Krallığı IV İslam Həmrəyliyi Oyunlarında 300 nəfərdən ibarət böyük nümayəndə heyəti ilə təmsil olunacaq. İdmançılarımız Təşkilat Komitəsinin təsdiq etdiyi əksər idman növləri üzrə, daha dəqiq desək, futbol, voleybol, həndbol, 3×3 basketbol, yüngül atletika, üzgüçülük, stolüstü tennis, tennis, güləş, ağır atletika, taekvando, karate, cüdo, gimnastika, su polosu, atıcılıq növlərində çıxış edəcəklər. Səudiyyəli idmançılar bu Oyunlarda yüksək səviyyədə çıxış etmək üçün hazırlaşıblar. İndidən qazanacağımız medalların sayını müəyyən etmək bir az çətin olar. Əslinə qalsa, bu Oyunlarda əsas məqsəd medalların sayı deyil, müsəlman xalqları arasında həmrəylik və yaxınlığın əldə edilməsidir. Ona görə də bu tədbirdə iştirak edəcək bütün müsəlman ölkələrinə və onların idmançılarına uğurlar diləyirik. Arzu edirik ki, bu Oyunlar xeyirli işlərin başlanğıcı olsun və müsəlman ölkə və xalqları arasında İslam həmrəyliyinə önəmli töhfə versin.
-Bildiyiniz kimi, 2017-ci il Azərbaycanda “İslam Həmrəyliyi ili” elan edilib. Ümumilikdə bu təşəbbüsün İslam ölkələri arasında sülhün və əmin-amanlığın təbliğ olunmasında əhəmiyyətini necə görürsünüz?
-Biz Səudiyyə Ərəbistanı Krallığı olaraq Azərbaycan Respublikasının müsəlman ölkələri arasında həmrəyliyin gücləndirilməsi üçün göstərdiyi bütün səyləri yüksək dəyərləndiririk. Prezident İlham Əliyevin İslam Oyunlarının keçirildiyi ili - 2017-ci ili Azərbaycanda “İslam Həmrəyliyi ili” elan etməsi dövlət başçısının bu məsələyə göstərdiyi diqqəti əks etdirir. İslam Həmrəyliyi Oyunları İslam dininin parlaq simasının izah edilməsi, onun mərhəmət, tolerantlıq və sülh dini olmasının bəyan edilməsi üçün böyük əhəmiyyətə malikdir. Digər tərəfdən, bu Oyunlar müsəlman ölkələri arasında qardaşlıq bağlarının gücləndirilməsində mühüm rol oynayacaq. Oyunlara dünyanın dörd qitəsindən gələn müxtəlif idman məktəblərinin nümayəndələri qatılacaq.
Azərbaycan Respublikasının müsəlman ölkələri arasında xüsusi yeri var. Bu, özünü istər İslam Əməkdaşlıq Təşkilatı, istərsə də digər böyük beynəlxalq təşkilatlar çərçivəsində İslam dünyasını düşündürən problemlərin həllində göstərdiyi fəal rolda öz əksini tapıb. Azərbaycan əvvəllər İslam Əməkdaşlıq Təşkilatının bir neçə nazirlər toplantısına ev sahibliyi edib, İslam dünyasının problemlərinə həsr olunan beynəlxalq konfranslar keçirib. İslam dünyasına aid problemlərin həllində Azərbaycanın oynadığı fəal rol, heç şübhəsiz, onun bütün müsəlman ölkələri ilə əlaqələrinin möhkəmlənməsində mühüm rol oynayacaq və regionun sabit, inkişaf edən gözəl ölkəsi kimi nüfuzunu daha da artıracaq.
-Son zamanlar ərəb ölkələrindən Azərbaycana xeyli turist gəlir. Ölkələrimiz arasında turizm sahəsində əlaqələrin inkişafını necə dəyərləndirirsiniz?
-Azərbaycanın həyata keçirdiyi mühüm tədbirlər, o cümlədən ərəb ölkələrindən turist axınının təmin edilməsi üçün yaxşı imkanların yaradılması, xüsusilə viza rejiminin sadələşdirilməsi nəticəsində Azərbaycana gələn səudiyyəli turistlərin sayında da nəzərəçarpacaq artım baş verib. Belə ki, ilin əvvəlindən indiyədək Azərbaycana 8 min səudiyyəli turist gəlib. “Səudiyyə Ərəbistanı Krallığının Hökuməti ilə Azərbaycan Respublikasının Hökuməti arasında hava əlaqəsi haqqında” 2015-ci il iyulun 8-də Ər-Riyad şəhərində imzalanmış Sazişə uyğun olaraq, bu ilin sentyabr ayında ölkələrimiz arasında birbaşa hava reysləri həyata keçirilməyə başlayandan sonra turistlərin illik sayının 20 minə çatacağını güman edirik.
Anar Rzayev
AZƏRTAC-ın müxbiri
Bölmənin digər xəbərləri
