Şəhid anası: Çağdaş dünyada müharibələr yalnız səngərlərdə getmir

19.10.2026 [17:34]
Çap et
A⁺ A^-

Tərtər, 19 oktyabr, AZƏRTAC

Tərtərdə Prezident, Müzəffər Ali Baş Komandan İlham Əliyevin Yeni Azərbaycan Partiyasının (YAP) VIII Qurultayındakı proqram xarakterli nitqindən irəli gələn məsələlərlə bağlı müşavirə keçirilib.

AZƏRTAC-ın bölgə müxbiri xəbər verir ki, tədbir Dövlət Himninin səsləndirilməsi ilə başlayıb. Sonra Ulu Öndər Heydər Əliyevin və şəhidlərin xatirəsi bir dəqiqəlik sükutla yad edilib.

Müşavirədə çıxış edən Tərtər Rayon İcra Hakimiyyətinin başçısı Müstəqim Məmmədov Prezident İlham Əliyevin YAP-ın VIII Qurultayındakı proqram xarakterli nitqindən irəli gələn vəzifələrdən danışıb. Qeyd edib ki, Yeni Azərbaycan Partiyasının VIII Qurultayı Azərbaycanın müasir dövlətçilik tarixində və siyasi sistemində tamamilə yeni bir mərhələnin başlanğıcını qoydu. Ərazi bütövlüyümüzün və suverenliyimizin tam bərpasından sonra keçirilən Qurultay Müzəffər Ali Baş Komandan İlham Əliyevin rəhbərliyi ilə qazanılan tarixi zəfərlərin məntiqi davamı və gələcək inkişafımızın strateji xəritəsidir.

İcra başçısı Prezident İlham Əliyevin müəyyən etdiyi inkişaf prioritetlərindən irəli gələn vəzifələrin həyata keçirilməsi, dövlətçilik ənənələrinin qorunması, milli həmrəyliyin möhkəmləndirilməsi istiqamətində fəaliyyətin davam etdirilməsinin vacibliyini diqqətə çatdırıb. Qeyd edib ki, suverenliyimizi qorumaq, hərbi qüdrətimizi artırmaq, ideoloji təxribatların vaxtında qarşısını almaq, davamlı sülhə nail olmaq, azad Qarabağı və Şərqi Zəngəzuru cənnətə çevirmək, insan kapitalını inkişaf etdirmək, sosial ədaləti və vətəndaş rifahını daha da yüksəltmək, gənclərimizin gələcəyinə yeni imkanlar açmaq – bütün bunlar qarşıdakı dövrün mühüm prioritetləridir.

Rayon Ağsaqqallar Şurasının sədri Faiq Məmmədov Prezidentin nitqindən “Ağsaqqallar gənclərə nümunə olmalı, milli-mənəvi dəyərlərin qorunması və təbliği işində fəal iştirak etməlidirlər”, sözlərini xatırladıb. Bildirib ki, ağsaqqallar gənclərə Azərbaycan reallıqlarını olduğu kimi çatdırmalı, ailə dəyərlərini uca tutmağı öyrətməlidirlər.

Talış kənd tam orta ümumtəhsil məktəbinin direktoru, şəhid anası Afidə Mirzəyeva çıxışında bildirib ki, günümüzün ən mühüm vəzifələrindən biri ideoloji təhlükəsizliyimizin təmin edilməsi və gənc nəslin vətənpərvərlik ruhunda tərbiyə olunmasıdır: “Çağdaş dünyada müharibələr yalnız səngərlərdə getmir. Bu gün informasiya məkanında, süni intellekt və kiberməkanda ölkəmizə, milli dəyərlərimizə qarşı yönələn təxribatlar az deyil. Biz təhsil işçiləri, müəllimlər şagirdlərimizi, gənclərimizi savadlı, bilikli yetişdirməklə yanaşı, onları yad ideologiyalardan, yalan və böhtan dolu təsir şəbəkələrindən qorumalıyıq. Bizim borcumuzdur ki, uşaqlarımıza bu torpaqların hansı qəhrəmanlıqlar hesabına azad edildiyini aşılayaq. Məktəb sadəcə təhsil ocağı deyil, həm də vətənpərvərlik məbədidir”.

44 günlük Vətən müharibəsi qazisi, Səhləbad kənd tam orta ümumtəhsil məktəbinin müəllimi Səbuhi İbrahimov isə çıxışında deyib: “Çağırışaqədərki hazırlıq müəllimi olaraq hesab edirəm ki, gənclərimizin vətənpərvərlik ruhunda tərbiyəsi bizim ən mühüm vəzifələrimizdən biridir. Gənclərə hərbi bilik və bacarıqlar aşılamaqla yanaşı, onlarda intizam, məsuliyyət, cəsarət, milli-mənəvi dəyərlərə hörmət və dövlətçiliyə sədaqət hisslərini də formalaşdırmalıyıq. Hər bir gənc bilməlidir ki, Vətənə xidmət yalnız silahla döyüşməkdən ibarət deyil. Yaxşı oxumaq, peşə sahibi olmaq, qanunlara hörmət etmək, cəmiyyətə fayda vermək, dövlətimizin maraqlarını qorumaq da Vətənə xidmətin mühüm nümunələridir”.

Sarıcalı kənd tam orta ümumtəhsil məktəbinin direktoru Vəsilə Mehtiyeva çıxışında bildirib ki, təhsil millətin gələcəyidir, cəhalətə, qaranlığa işıq tutur. “Biz təhsil işçiləri əlimizdən gələni edirik və bundan da artıq etməliyik ki, gələcəyimiz olan gənclər təhsilli, vətənpərvər yetişsinlər. Milli maraqlarımızı qorusunlar, milli-mənəvi dəyərlərimizə sahib çıxsınlar”, - deyə o əlavə edib.

Müşavirə digər çıxışlarla davam etdirilib.

_{Müxbir – Tahir Ağaməmmədov}