Şəhidlərin əziz xatirəsi Ağdam, Beyləqan rayonlarında və Xocavənd qəsəbəsində də ehtiramla anılıb
Ağdam, 27 sentyabr, Tahir Ağaməmmədov, AZƏRTAC
Vətən uğrunda canlarını qəhrəmancasına fəda etmiş şəhidlərimizin xatirəsi Ağdam rayonunda da ehtiramla anılıb.
AZƏRTAC-ın bölgə müxbiri xəbər verir ki, 27 Sentyabr- Anım Günü münasibətilə keçirilən tədbirin iştirakçıları əvvəlcə Quzanlı qəsəbəsində Ümummilli Lider Heydər Əliyevin abidəsini ziyarət edib, önünə tər gül dəstələri düzüblər. Sonra Şəhidlər xiyabanı ziyarət olunub, ölkəmizin ərazi bütövlüyü uğrunda canından keçən Vətən övladlarının məzarları üzərinə gül dəstələri düzülüb.
Rayonun girişindəki Şəhidlər Abidə Kompleksində davam edən anım mərasimində Azərbaycanın Dövlət Himni səsləndirilib, Ulu Öndər Heydər Əliyevin və şəhidlərin xatirəsi bir dəqiqəlik sükutla yad edilib. Mərasimdə çıxış edən rayon icra hakimiyyətinin başçısı Vaqif Həsənov 2020-ci il sentyabrın 27-də Ermənistanın cəbhə boyu genişmiqyaslı təxribatına əks cavab olaraq Müzəffər Ali Baş Komandan İlham Əliyevin rəhbərliyi ilə Azərbaycan Ordusunun düşmənə layiqli cavab verərək tarixi ədaləti bərpa etməsindən, 44 günlük Vətən müharibəsində xalqımızın Prezidentin ətrafında sıx birləşərək tarixi Zəfərə imza atmasından, 2023-cü il sentyabrın 19-20-də Azərbaycan Ordusunun həyata keçirdiyi 24 saatlıq lokal xarakterli antiterror tədbirləri nəticəsində Qarabağda yerləşən qeyri-qanuni erməni hərbi birləşmələrinin tərk-silah edilməsindən bəhs edib.
Sonra tədbir iştirakçıları Şəhidlər Abidə Kompleksində Birinci Qarabağ Müharibəsi Şəhidlərinin xatirəsinə ucaldılmış lövhənin önünə gül dəstələri düzüblər.
Anım Günü rayon ərazisində müxtəlif qəbiristanlıqlarda dəfn edilmiş şəhidlərin məzarları da ziyarət olunub. Quzanlı şəhidlərin xatirəsinə inşa edilmiş mərasim evində ehsan süfrəsi açılıb.
Saat 12:00-da respublikanın hər yerində olduğu kimi Ağdam rayonunda da şəhidlərin xatirəsi bir dəqiqəlik sükutla yad edilib.
X X X
Beyləqan rayonunda da şəhidlərin xatirəsi sonsuz ehtiramla yad edilib.
Beyləqan Rayon İcra Hakimiyyətinin, hüquq-mühafizə orqanlarının rəhbərlərinin, idarə, müəssisə və təşkilatların kollektivlərinin, şəhid ailələrinin, qazilərin, hərbçilərin və yüzlərlə ictimaiyyət nümayəndəsinin iştirak etdiyi tədbirdə əvvəlcə şəhidlərin məzarları ziyarət olunub, üzərlərinə gül dəstələri düzülərək xatirələri ehtiramla yad edilib.
Mərasimdə çıxış edən rayon icra hakimiyyətinin başçısı Əziz Əzizov bildirib ki, Azərbaycan xalqının qəhrəman övladları öz igidliyi, rəşadəti və Vətən sevgisi ilə ölümsüzlüyə qovuşublar. Onların qanı ilə yazılmış qəhrəmanlıq dastanı xalqımızın yaddaşında əbədi yaşayacaq. Hər bir şəhid Azərbaycan xalqının azadlığı, müstəqilliyi və gələcəyi naminə igidlik simvoludur. Bizim müqəddəs borcumuz onların əziz xatirəsini daim yaşatmaq, gələcək nəsillərə ötürməkdir. Prezident, Müzəffər Ali Baş Komandan İlham Əliyevin rəhbərliyi ilə qazanılan tarixi Zəfər, bu gün dövlət səviyyəsində qeyd olunan Anım Günü, şəhidlərimizə olan sonsuz hörmətin və xalqımızın birlik iradəsinin təntənəsidir.
Mərasimdə iştirak edən ictimaiyyət nümayəndələri şəhidlərimizin ruhuna rəhmət, qazilərimizə isə şəfa diləyərək, onların qəhrəmanlığının daim qəlblərdə yaşayacağını vurğulayıblar.
X X X
Sentyabrın 27-də Beyləqan rayonu inzibati ərazisində salınmış 500 ailəlik Xocavənd qəsəbəsində 44 günlük Vətən müharibəsi şəhidlərinin dəfn olunduğu Şəhidlər məzarlığında da anım tədbiri keçirilib.
Xocavənd Rayon İcra Hakimiyyətinin əməkdaşları, şəhid ailələrinin üzvləri, I və II Qarabağ müharibəsi iştirakçıları, veteranlar, İctimai Şura və rayon ictimaiyyəti nümayəndələrinin iştirak etdiyi mərasimdə şəhidlərin məzarları üzərinə gül dəstələri qoyulub, xatirələri bir dəqiqəlik sükutla yad edib.
Tədbirdə çıxış edən rayon icra hakimiyyətinin başçısı Eyvaz Hüseynov bildirib ki, 30 ilə yaxın davam edən Qarabağ münaqişəsinə Ali Baş Komandan İlham Əliyevin rəhbərliyi ilə qüdrətli Azərbaycan Ordusunun əzmkarlığı, qəhrəmanlığı və şücaəti nəticəsində 44 gün davam edən müharibə ilə tamamilə son qoyuldu. Müharibədə cəmiyyətimizin nümayiş etdirdiyi möhtəşəm səfərbərlik xalqımızın dövlət başçısının ətrafında sıx birləşməsinin bariz ifadəsi olmaqla yanaşı, eyni zamanda, Azərbaycanın bütün dünyada özünütəsdiqi kimi qəbul edildi. Azərbaycan Ordusunun zəfər yürüşü, Qarabağın və Şərqi Zəngəzurun işğaldan tam azad edilməsi, uzun illər düyünə düşmüş və region üçün təhlükə mənbəyi olan Dağlıq Qarabağ münaqişəsinin uğurla və ədalətlə həll edilməsi həm də yaşadığımız bölgədə sülhə və təhlükəsizliyə əvəzsiz töhfədir.
Tədbirdə digər çıxış edənlər Ali Baş Komandan İlham Əliyevin rəhbərliyi ilə həyata keçirilən 44 günlük Vətən müharibəsinin xalqımızın yaddaşında silinməz izlər buraxdığını və əldə olunmuş Qələbənin Azərbaycan tarixinə qızıl hərflərlə yazıldığını bildiriblər.
Anım Gününün beşinci ildönümü ilə bağlı 320 ailəlik Xocavənd qəsəbəsində ağacəkmə aksiyası keçirilib. Aksiya zamanı ərazidə təmizlik işləri aparılıb, 100 ədəd Eldar şamı əkilib, yeni əkilən ağaclar suvarılıb və aqrotexniki qaydada qulluq göstərilib.
Bölmənin digər xəbərləri
