Səidə Səfərova: Moldovada yaşayan soydaşlarımızda Azərbaycan dilinə, tarixinə maraq böyükdür MÜSAHİBƏ
Kişineu, 24 iyun, AZƏRTAC
Azərbaycandan uzaqda yaşayan soydaşlarımızın ana dilində təhsili üçün həftəsonu məktəblərin yaradılması dövlətimizin prioritet məqsədlərindən biridir. Moldova Azərbaycanlıları Konqresinin nəzdində yaradılan Həftəsonu Azərbaycan Məktəbi Diasporla İş üzrə Dövlət Komitəsi tərəfindən fəal dəstəklənir. Azərbaycan icmasının 50-dən çox üzvünün uşaqları bu məktəbdə oxuyur. Dərslər İon Kryanqe adına Moldova Dövlət Pedaqoji Universitetində keçirilir.
AZƏRTAC-ın müsahibi isə məktəbin müəllimi Səidə Səfərovadır. Azərbaycan Dövlət Pedaqoji Universitetinin Filologiya fakültəsini bitirən və bu sahə üzrə Azərbaycanda uzun müddət iş təcrübəsi olan Səidə Səfərova artıq illərdir Moldovada yaşayan soydaşlarımızın təhsili üçün çalışır.
- Necə oldu ki, Moldovada bazar günü məktəbində fəaliyyətə başladınız?
- Moldovada Həftəsonu Azərbaycan Məktəbi artıq 4 il olar ki, fəaliyyətini davam etdirir. Məktəbimiz Kişineu və Dnestrin sol sahili Benderi şəhərlərində fəaliyyət göstərir. Burada yaşayan həmvətənlərimizdə övladlarının Azərbaycan dilini, tarixini və milli-mənəvi dəyərlərini bilib onları yaşatmaq arzusu və istəkləri nəticəsində Moldova Azərbaycanlıları Konqresi nəzdində bu məktəblər yaradılıb. Xaricdə yaşayan hər bir azərbaycanlı uşağın öz ana dilini bilməsi və vətəni ilə bağlılığını qoruması mənim üçün çox önəmlidir. Bu məqsədlə Moldova Azərbaycanlıları Konqresinin nəzdində fəaliyyət göstərən həftəsonu məktəbində müəllim kimi çalışmağa başladım və bu işi böyük sevgi və məsuliyyətlə davam etdirirəm.
- Moldovada soydaşlarımızın Azərbaycan dilini, tarixini və mədəniyyətini öyrənmək istəyi nə dərəcədə çoxdur?
- Sevindirici haldır ki, maraq ildən-ilə artır. Valideynlər övladlarının ana dilini unutmasını istəmirlər və onların Azərbaycan tarixini, mədəniyyətini, adət-ənənələrini öyrənməsinə xüsusi önəm verirlər. Şagirdlər də dərslərdə, tədbirlərdə və müxtəlif layihələrdə böyük həvəslə iştirak edirlər. Bazar günü məktəbi təkcə dərs və dərslik deyil, həm də uşaqların öz doğma kökləri ilə əlaqə saxladıqları, öz xalqlarının dilini, tarixini, adət-ənənələrini öyrəndikləri, dostlar və həmfikirlər tapdıqları isti məkandır.
- Azərbaycan diasporunun Moldova cəmiyyətinə inteqrasiyası prosesini necə dəyərləndirərdiniz?
- Hesab edirəm ki, Azərbaycan diasporu Moldova cəmiyyətinə uğurla inteqrasiya olunub. Soydaşlarımız ölkənin ictimai, iqtisadi və mədəni həyatında fəal iştirak edir, eyni zamanda milli kimliyini, dilini və adət-ənənələrini qoruyub saxlayır. Bu balans həm Azərbaycanı layiqincə təmsil etməyə, həm də iki xalq arasında dostluq əlaqələrinin möhkəmlənməsinə xidmət edir.
- Moldovada azərbaycanlı uşaqların əsas istəyi və arzusu nədir?
- Onlar milli bayramlarımızı qeyd etməyi, Azərbaycanı beynəlxalq tədbirlərdə təmsil etməyi və öz uğurları ilə həm Vətənimizi, həm də yaşadıqları ölkəni daima sevindirməyi çox xoşlayır və arzulayırlar. Mən də müəllim olaraq onları öz fəaliyyətimlə daima dəstəkləyirəm və bu arzularının reallaşması üçün əlimdən gələni edirəm.
Bölmənin digər xəbərləri
