Separatçıların ruporu rolunda çıxış edən BBC-nin fəaliyyəti araşdırılmalıdır - ŞƏRH
Bakı, 4 sentyabr, AZƏRTAC
Azərbaycanda söz və mətbuat azadlığının verdiyi imkanlardan sui-istifadə edib, bir sıra hallarda qərəzli və sifarişli materiallar hazırlayaraq ölkəmizə qarşı beynəlxalq miqyasda aparılan kampaniyaya qoşulan bəzi media qurumlarının fəaliyyəti araşdırılmalıdır. Xüsusilə də xaricdən maliyyələşən "Azadlıq radiosu", "BBC", "Amerikanın səsi” kimi media nəhənglərinin insan haqlarının müdafiəsi adı altında təşkil edilən “səlib yürüşlərində” alət kimi istifadə olunması yolverilməzdir. Onlar mütəmadi olaraq Qarabağın erməni sakinlərinin “problemlərini” gündəmdə saxlamaqla anti-Azərbaycan təbliğatını daha da gücləndirirlər.
Bu sözləri AZƏRTAC-a müsahibəsində politoloq Ramiz Alıyev söyləyib.
O qeyd edib ki, “humanitar fəlakət” şousunun ruporu rolunda çıxış edən media qurumları Gürcüstanın və Ukraynanın dövlət maraqlarını təbliğ etdikləri halda, Azərbaycana gəldikdə daim milli azlıqlar, separatizm, dini məzhəblər, insan hüquqlarının pozulması kimi mövzuları araşdırırlar. Biz bu istiqamətdə son günlər BBC-nin fəallığının artdığını görürük. Otuz il ərzində Azərbaycanın suverenliyinin pozulmasını, bir milyondan çox insanın qaçqın və məcburi köçkün düşməsini açıq şəkildə, cəsarətlə işıqlandırmayan media qurumu bu gün Xankəndidə yaşayan 20-25 min nəfərlik etnik toplumun hər bir xırda problemlərinə geniş yer verir, bunu humanitar fəlakət kimi dünyaya təqdim edir. Ermənistanın belə Azərbaycanın ərazisi kimi tanıdığı Qarabağda “120 min insanın aclıqla üzləşdiyini” yazmaq üçün jurnalistin əlində kifayət qədər fakt olmalıdır. Bunu yazan jurnalist Xankəndidə olubmu, oranın sakinlərini sayıbmı, bazarları, marketləri gəzibmi? Azərbaycanın Xankəndi ermənilərinə təklif etdiyi humanitar yüklərdən niyə bəhs etmirlər? Məntiqlə, aclıqdan əziyyət çəkənlər onlara edilən humanitar təklifləri qəbul etməli və buna görə Azərbaycan dövlətinə təşəkkür etməlidirlər. Bəlkə, Qarabağ erməniləri aclıq aksiyası keçirirlər, xəbərimiz yoxdur?
“Azərbaycan Mətbuat Şurasının təbirincə desək, BBC Qarabağdakı separatçı qüvvələrin təmsilçilərinə efir şansı tanımaqla və mövcud xüsusda reallığa zidd olan saxta sentimentallıq səhnələrinə yer ayırmaqla Azərbaycana qarşı aparılan gözdənsalma və təzyiq kampaniyasına qoşulur. Tez-tez “Laçın dəhlizi” mövzusuna toxunan, həmin sərhəd-buraxılış məntəqəsi qarşısında düzülərək siyasi şouda rol alan erməni TIR-larını tez-tez nümayiş etdirən BBC nədənsə Ağdam-Xankəndi yolunda gözləyən ərzaq yüklərini görməzlikdən gəlir. Söz və mətbuat azadlığından sui-istifadə edərək özünün qərəzli niyyətlərini həyata keçirməyə çalışan belə media orqanlarının sifariş həyata keçirdikləri aydın görünür. Hər bir media qurumu dövlətlərin ərazi bütövlüyü hüququna, sərhədlərin toxunulmazlığı prinsiplərinə hörmətlə yanaşmalıdır. Separatizmi körükləyən, sabitlik, sülh və əmin-amanlığa qarşı materiallar hazırlayıb işıqlandıran media orqanının fəaliyyəti araşdırılmalı, barəsində sərt ölçü götürülməlidir. Artıq Mətbuat Şurası BBC telekanalının Azərbaycanla Ermənistan arasında münasibətlər, Qarabağ iqtisadi rayonunda ermənilərin yaşadığı ərazidə mövcud vəziyyətlə bağlı qeyri-obyektiv materiallar yayımladığını pisləyən bəyanat yayıb. Haqlı olaraq bəyanatda göstərilir ki, hazırlanan materiallarda suveren ərazimiz olan Qarabağ bölgəsindəki erməni separatçıları təbliğ edilir. Jurnalistika prinsiplərini kobud şəkildə pozan BBC jurnalistika sahəsində manipulyasiyaya yol verir. Separatizmin tör-töküntülərinə efir, tribuna vermək, əli dinc insanların qanına batmış canilərə mikrofon uzatmaq və onların təhlükəli, sərsəm fikirlərini yaymaq media dəyərlərinə ziddir”, - deyə politoloq vurğulayıb
O əlavə edib ki, Azərbaycanın aidiyyəti orqanları ölkədə fəaliyyət göstərən və separatizmi bu və ya digər formada təbliğ edən, bununla da onlara dəstək verən media qurumlarının fəaliyyətini araşdırmaqla müvafiq qərarlar qəbul etməlidir.
Bölmənin digər xəbərləri
