SİYASƏT
Serbiyanın RTS kanalı Azərbaycanın müstəqillik tarixindən bəhs edib VİDEO
Belqrad, 13 yanvar, AZƏRTAC
Hazırda ATƏT-ə sədrlik edən Serbiyanın RTS dövlət kanalının saytında “Qərb və Şərq arasında harmoniya: Serbiya tərəfdaşının nümunəsi” sərlövhəli məqalə yerləşdirilib. RTS-in redaksiya heyəti tərəfindən hazırlanmış məqalədə bildirilir ki, Cənubi Qafqazın ən böyük ölkəsi olan Azərbaycan həm coğrafi mövqeyinə görə, həm də geostrateji baxımdan Şərq və Qərb arasında mühüm bir nöqtədə yerləşir. Dünya miqyasında Azərbaycanın yerini və rolunu anlamaq üçün bu ölkənin tarixinə nəzər yetirmək kifayətdir.
Diqqətə çatdırılır ki, 1918-ci ildə müsəlman Şərqində ilk dəfə olaraq Azərbaycanda demokratik respublika quruldu. Həmin dövrün mürəkkəb geosiyasi vəziyyəti Azərbaycan Xalq Cümhuriyyətinin cəmi iki il ömür sürməsinə gətirib çıxardı. Azərbaycan xalqının azadlıq uğrunda uzun müddət davam edən mübarizəsi müstəqilliyin bərpası ilə nəticələndi. Lakin müstəqilliyin ilk illəri Azərbaycan üçün olduqca çətin keçdi. Azərbaycanın torpaqlarının 20 faizinin Ermənistan tərəfindən işğalı vəziyyəti daha da gərginləşdirdi. Ermənistan silahlı qüvvələrinin təcavüzü nəticəsində bir milyondan çox azərbaycanlı qaçqın və məcburi köçkünə çevrildi. Mürəkkəb siyasi vəziyyət, Ermənistan-Azərbaycan, Dağlıq Qarabağ münaqişəsi və iqtisadiyyatın zəifləməsi ölkədə sabitliyin pozulmasına gətirib çıxardı.
Yazıda vurğulanır ki, 1993-cü ildə Azərbaycan xalqının ümummilli lideri Heydər Əliyevin hakimiyyətə gəlməsi ilə ölkədə yeni inkişaf dövrü başlandı. 1995-ci ildə bütün vətəndaşların bərabərliyini, şəxsi mülkiyyətin toxunulmazlığını və digər mühüm prinsipləri əks etdirən Konstitusiyanın qəbul olunması ilə ölkədə demokratik inkişafın təməli qoyuldu. Bu dövrdən başlayaraq kompleks islahatlar həyata keçirilməyə başlandı. Ulu öndər Heydər Əliyevin təşəbbüsü ilə 1994-cü ildə imzalanan “Əsrin müqaviləsi” Azərbaycanın iqtisadi tərəqqisi üçün zəmin rolunu oynadı. Bu gün bizim gördüyümüz güclü Azərbaycan dövlətinin əsası qoyuldu. Sabitlik məfhumu ölkənin təhlükəsizlik konsepsiyasında əsas prinsipə çevrildi.
Məqalədə bildirilir ki, ümummilli lider Heydər Əliyevin layiqli davamçısı Prezident İlham Əliyevin rəhbərliyi ilə bu gün Azərbaycan stabil, demokratik və iqtisadi inkişaf yoluna qədəm qoyub. Son on ildə həyata keçirilən uğurlu siyasət nəticəsində bir milyon 200 mindən artıq yeni iş yeri açılıb, işsizliyin səviyyəsi xeyli aşağı düşüb. Azərbaycan rəhbərliyinin müdrik siyasəti nəticəsində ölkə siyasi və iqtisadi kataklizmlərdən yan keçib.
Ölkəmizdə mövcud tolerantlıq mühitindən bəhs olunan yazıda qeyd olunur ki, Prezident İlham Əliyev tarixən Azərbaycanda mövcud olan multikulturalizm və tolerantlıq ənənələrini dövlət siyasəti səviyyəsinə qaldırdı. Müxtəlif dinlərin nümayəndələri bu ölkədə sülh, dostluq və qarşılıqlı hörmət şəraitində yaşayırlar. Demokratik dəyər kimi önəmli anlayış olan multikulturalizmin təbliği istiqamətində Azərbaycan mühüm rol oynayır. Paytaxt Bakı mədəniyyətlərarası görüşlərin keçirildiyi önəmli bir məkana çevrilib.
Vurğulanır ki, Azərbaycan tərəfindən həyata keçirilən bir çox layihələr təkcə Avropanın enerji təhlükəsizliyinin təmin olunması baxımından deyil, eyni zamanda, enerji ehtiyatları uğrunda müxtəlif regionlar arasında mövcud gərginliyin azaldılması istiqamətində də önəmlidir.
Azərbaycan-Serbiya münasibətlərinə də toxunulan yazıda qeyd olunur ki, iki ölkə arasında strateji tərəfdaşlıq əlaqələri mövcuddur. Tarixən ölkələrimiz oxşar talelər yaşayıblar. Bu gün də Azərbaycan ilə Serbiyanı birləşdirən bir sıra ortaq cəhətlər var: hər iki ölkədə xalqın maraqları ilə üst-ütsə düşən müstəqil xarici siyasət həyata keçirilir, hər iki ölkənin mürəkkəb geosiyasi durumu müsbət tərəfə yönəltmək kimi bir təcrübəsi var. Bütün bu məqamlar gələcəkdə Azərbaycan və Serbiya arasında əlaqələrin yeni istiqamətlərini müəyyənləşdirə bilər.
Maqsud Dadaşov
AZƏRTAC-ın xüsusi müxbiri
Belqrad