SƏRHƏDÇİLƏRƏ SİLAHLI MÜQAVİMƏT GÖSTƏRƏN DƏSTƏNİN BİR ÜZVÜ YAXALANMIŞDIR
Dövlət Sərhəd Xidmətinin mətbuat mərkəzindən AZƏRTAC-a bildirmişlər ki, qaçaqmalçılığa qarşı mübarizə tədbirlərini gücləndirən sərhədçilər noyabrın 9-da saat 5:30 radələrində Ağstafa rayonu ərazisində Azərbaycan tərəfdən Gürcüstan istiqamətində dövlət sərhədini pozmağa cəhd göstərən atlı sərhəd pozucularını müşahidə etmiş və onları yaxalamaq üçün təlimata uyğun hərəkət edərkən sərhəd pozucuları sərhəd naryadının “Dayan!” tələbinə atəşlə cavab vermişlər. Sərhəd pozucuları ilə atışma təxminən 20 dəqiqə davam etmişdir. Nəticədə sərhəd pozucularından bir nəfər tərksilah edilərək saxlanılmış, digərləri isə havanın qaranlıq olmasından və yerli relyefin xüsusiyyətlərindən istifadə etməklə qonşu ölkənin ərazisinə keçməyə müvəffəq olmuşlar.
Saxlanılmış sərhəd pozucusundan bir ədəd AK-74 markalı silah, 6 ədəd 5,45 millimetrlik patron, bir avtomat darağı aşkar olunaraq götürülmüşdür. Həmçinin ərazidə sərhəd pozucularına məxsus 3 baş at və çoxlu qaçaqmal aşkar edilmişdir.
Faktla bağlı Dövlət Sərhəd Xidmətinin istintaq şöbəsi tərəfindən qaldırılmış cinayət işi üzrə istintaq aparılır.
Bölmənin digər xəbərləri
