Şərqi Afrikada pandemiya səbəbindən 38 milyon insan işini itirib
Qahirə, 30 noyabr, AZƏRTAC
Şərqi Afrika ölkələrində COVID-19 pandemiyası dövründə 38 milyon insan işsiz qalıb. AZƏRTAC xəbər verir ki, bu məlumat BMT-nin Afrika üzrə Komissiyasının hesabatında yer alıb.
Komissiyanın sədri Mama Keita jurnalistlərə bildirib ki, pandemiya dövründə həmin ölkələrin iqtisadi tənəzzülü daha da dərinləşib. İşsizlik problemi ilə yanaşı, ali və orta məktəblər də bağlanıb. Hazırda onların 96 faizi fəaliyyət göstərmir. Onun sözlərinə görə, texnologiyanın zəif olması nəticəsində Afrikanın əksər ölkələrində distant təhsilin həyata keçirilməsi də mümkün deyil.
BMT-nin Afrika üzrə Komissiyasının hazırladığı hesabatda qeyd olunur ki, ən ağır vəziyyət Efiopiya, Eritreya, Burundi və Keniyadadır. Həmçinin pandemiya şəraitində silahlı münaqişələrin artması, terror təşkilatlarının fəallaşması, quraqlıq acınacaqlı sosial-iqtisadi vəziyyəti daha da pisləşdirib. Sözügedən hesabatın Afrika İttifaqının növbəti sammitində müzakirə edilməsi təklif olunub.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
