Sevinc Fətəliyeva: Dünya ictimaiyyəti Ermənistanda terrorçuların qəhrəmanlaşdırılmasına laqeyd qalmamalıdır
Bakı, 31 iyul, AZƏRTAC
Tarixən ermənilər müxtəlif ağır cinayətlərin, kütləvi qırğınların, qətliamların törədilməsində iştirak ediblər. Bu cinayətlərdə onlar əsasən muzdlu olublar. Eləcə də müəyyən xarici qüvvələrin, dövlətlərin əlində alət olublar. Ermənilər üçün bu “ənənə” hazırda da davam edir.
Bu fikirləri AZƏRTAC-a açıqlamasında Milli Məclisin Beynəlxalq münasibətlər və parlamentlərarası əlaqələr komitəsinin sədr müavini Sevinc Fətəliyeva söyləyib.
Deputat bildirib ki, ermənilər son iki yüz il ərzində azərbaycanlılara və türklərə qarşı qətliamlar, soyqırımlar törədiblər. 1905-ci, 1918-ci illərin qırğınları, eləcə də müasir dövrümüzdə Xocalı soyqırımı buna sübutdur. Ermənilər 30 illik işğal dövründə də bir çox hərbi cinayətlər, kütləvi qətllər həyata keçiriblər. Bu prosesdə erməni kilsəsi də “ilhamverici” rol oynayıb. Eləcə də ASALA kimi terror təşkilatlarının türklərə, Türkiyə diplomatlarına qarşı cinayətləri bütün dünyaya məlumdur.
Deputatın sözlərinə görə, hər il iyulun 27-də Ermənistan ictimaiyyəti “Lissabon 5” adlı anım mərasimi keçirir. Bu tədbir Amerika Birləşmiş Ştatları, Fransa, Livan erməniləri tərəfindən də qeyd olunur. Adətən belə tədbirlərdə erməni ruhanilər “öz ləyaqətli ölümləri ilə erməni icmasını sarsıtmış azadlıq uğrunda canlarından keçən qəhrəmanlar”ın şərəfinə rekviyemlər söyləyirlər.
“Bəs “Lissabon 5” nədir? 1983-cü il iyulun 27-də Sarkis Abrahamyan, Setrak Acemyan, Vaçe Dağlıyan, Ara Kurcuhliyan və Simon Yahneyan Lissabondakı Türkiyə səfirliyinə daxil olaraq müvəqqəti işlər vəkilinin xanımı Cahidə Mıhıçoğlunu və 17 yaşlı oğlu Atasayı girov götürmüşdülər. Portuqaliyanın Baş naziri Mario Soares hadisəni nəzarətə götürmüş və cinayət yerinə göndərdiyi 170 polis səfirliyin binasını mühasirəyə almışdı. Terrorçular diplomatın xanımını və bir Portuqaliya polisini qətlə yetirərək özləri ilə bərabər binanı partlatmışdılar. Hadisəyə ABŞ Prezidenti Ronald Reyqan da münasibət bildirmişdi. Terrorçuların xanımı qətlə yetirmələri onu xüsusilə təsirləndirmişdi. ABŞ Prezidenti bəyan etmişdi: “Biz digər ölkələrin hökumətləri ilə birgə çalışaraq buna birdəfəlik son qoyacağıq”. ABŞ Milli Təhlükəsizlik Şurasının üzvü Oliver North terrorçuların neytrallaşdırılmasına yönəlmiş Milli Təhlükəsizlik Qərarları Direktivi (MTQD) hazırlamışdı. 138 nömrəli həmin MTQD Amerikanın özünü terrorçulardan qoruma hüququnu əks etdirir”, - deyə Sevinc Fətəliyeva vurğulayıb.
Deputat qeyd edib ki, belə faktlar Ermənistanda terrorçuların qəhrəmanlaşdırıldığını göstərir. Ona görə də dünya ictimaiyyəti bu məsələyə laqeyd qalmamalıdır.
Bölmənin digər xəbərləri
