Bakı, 4 mart, AZƏRTAC

Azərbaycan tarixən birgəyaşayış modelinin nadir nümunəsi olub. Əsrlərboyu Azərbaycan ərazisində tolerant mühit hökm sürüb. Azərbaycan müstəqillik qazandıqdan sonra bu amil daha da güclənib. Bu gün ölkəmizdə müxtəlif xalqların və dinlərin nümayəndələri bərabər hüquqlar çərçivəsində, mehriban şəraitdə yaşayırlar.

AZƏRTAC xəbər verir ki, bu fikirləri Milli Məclisin beynəlxalq münasibətlər və parlamentlərarası əlaqələr komitəsinin sədr müavini, YAP-ın beynəlxalq əlaqələr şöbəsinin müdiri Sevinc Fətəliyeva deyib.

S.Fətəliyeva bildirib ki, Azərbaycan dünyada tolerantlıq mərkəzlərindən biridir. Onun sözlərinə görə, ölkəmizdə mövcud olan bu kimi dəyərlər dünya ictimaiyyəti tərəfindən təqdir olunur. Təsadüfi deyil ki, multikulturalizm dövlət siyasəti səviyyəsindədir, tolerantlıq cəmiyyətimizin ayrılmaz tərkib hissəsidir. Bu baxımdan digər xalqların nümayəndələri kimi, Azərbaycan vətəndaşları olan ermənilər də bütün hüquqlardan istifadə edirlər. Bu gün ölkəmizdə 30 minə yaxın erməni yaşayır. Bu fakt Qarabağ ermənilərinin də Azərbaycan vətəndaşları olaraq ölkəmizin qanunları əsasında yaşamasının təminatlarından biridir. Prezident İlham Əliyevin fevralın 26-da yerli və xarici media nümayəndələri üçün keçirdiyi mətbuat konfransında dediyi kimi, bizim xalqlar sülh şəraitində yaşamalıdırlar. Bundan sonra Azərbaycan və erməni xalqlarının birgə yaşaması ilə bağlı aydın təsəvvürlər var. Azərbaycanda heç vaxt dini, milli zəmində hər hansı qarşıdurma, anlaşılmazlıq olmayıb. Bu, bizim böyük nailiyyətimizdir. Dövlətimizin başçısının söylədiyi kimi, Azərbaycanda fərqli dildə danışan insanların hər cür hüquq və imtiyazları mövcuddur. Digər bütün dillər kimi, erməni dili də Azərbaycanda qorunacaq.

Deputat qeyd edib ki, davamlı sülh regionun inkişafını təmin edən əsas amildir. Davamlı sülhə nail olmaq prioritet vəzifədir. Bundan sonra region xalqları arasında düşmənçiliyə xidmət edən bütün hallara son qoyulmalıdır. Noyabrın 10-da imzalanmış birgə bəyanat bunun üçün zəmin yaradır.

S.Fətəliyevanın fikrincə, gələcəkdə normal birgəyaşayışın əsas şərtlərindən biri əməkdaşlıqdır. Bu amil, həmçinin dayanıqlı inkişaf üçün əsas yaradır. Azərbaycanın məqsədi artıq üçtərəfli qaydada - Ermənistan və Rusiya ilə birlikdə kommunikasiyaların bərpası, Zəngəzur dəhlizinin yaradılması və nəqliyyat baxımından bütün maneələri aradan qaldırmaqdır. Bu, baş tutsa, Ermənistan da mənfəət əldə edəcək, onlar sülhün xeyrini görəcəklər. Bununla da əməkdaşlıq münasibətləri region xalqlarına tədricən böyük faydalar gətirəcək.