Səyahət gəmiləri sentyabrın 17-dək Avstraliya sularına buraxılmayacaq
Bakı, 22 may, AZƏRTAC
Avstraliya hakimiyyəti səyahət gəmilərinin ölkə sularına daxil olmasına qoyulan qadağanı sentyabrın 17-nə qədər uzadıb.
AZƏRTAC xəbər verir ki, bu barədə məlumat Sərhəd Xidmətinin mətbuatda yayılan bəyanatında yer alıb.
“Səyahət gəmilərinin Avstraliya sularına daxil olmasına qoyulan qadağa daha üç ay - 2020-ci il sentyabrın 17-dək uzadılıb. Yüz nəfərdən çox sərnişin tutumuna malik bütün səyahət gəmilərinin ölkəyə girişi qadağandır”, - deyə qurumun bəyanatında bildirilir.
Avstraliya hakimiyyəti koronavirusun yayılmasının qarşısını almaq məqsədilə səyahət gəmilərinin ölkəyə daxil olmasını martın 27-də qadağan etmişdi.
Martın 11-də Dünya Səhiyyə Təşkilatı COVID-19 xəstəliyinə səbəb olan yeni koronavirusun yayılmasını pandemiya elan edib. Pandemiyanın statistikasını aparan Worldometer saytının Bakı vaxtı ilə bu gün saat 14:40-a olan məlumatına əsasən, dünyada 5 milyon 217 mindən çox yoluxma və 335 min 53 ölüm faktı qeydə alınıb, 2 milyon 96 min 632 nəfər isə COVID-19 xəstəliyindən sağalıb.
Avstraliyada indiyə qədər yeni koronavirusa 7 min 95 nəfər yoluxub, onlardan 101 nəfəri həyatını itirib. Hazırda müalicə alan 515 xəstədən 7-nin vəziyyəti ağır qiymətləndirilir.
Bölmənin digər xəbərləri
