“Seysmiklik, zəlzələlərin proqnozu, tikililərin zəlzələyə davamlılığı” mövzusunda V Beynəlxalq konfransın iştirakçıları Şamaxıda olmuşlar
Bakı, 12 oktyabr (AZƏRTAC). Azərbaycanda seysmoloji xidmətin yaranmasının 110 illiyinə həsr olunmuş “Seysmiklik, zəlzələlərin proqnozu, tikililərin zəlzələyə davamlılığı” mövzusunda Bakıda keçirilən V Beynəlxalq konfransın iştirakçıları Şamaxı rayonunda olmuşlar.
Azərbaycan Milli Elmlər Akademiyası (AMEA) Respublika Seysmoloji Xidmət Mərkəzinin (RSXM) mətbuat xidmətindən AZƏRTAC-a bildirmişlər ki, qonaqlar əvvəlcə ümummilli lider Heydər Əliyevin rayon mərkəzində ucaldılmış abidəsini ziyarət etmişlər.
Daha sonra onlar tarix-diyarşünaslıq muzeyinə, 1902-ci ildə Şamaxıda baş vermiş dəhşətli zəlzələ zamanı dağılan və sonradan bərpa edilmiş Cümə məscidinə, zəlzələnin episentrinə düşən əraziyə baş çəkmişlər.
Eyni zamanda, xarici ölkələrin seysmoloqlarına Nəsirəddin Tusi adına Şamaxı Rəsədxanası və orada aparılan işlər haqqında məlumat verilmişdir.
Konfrans iştirakçıları, həmçinin AMEA RSXM-in seysmotelemetrik monitorinq mərkəzi ilə tanış olmuşlar.
Bölmənin digər xəbərləri
