Siçanların beynində onların oynaq davranışını idarə edən nahiyə müəyyən olunub
Bakı, 29 iyul, AZƏRTAC
Siçanlar olduqca əyləncəli təbiətə malik heyvanlardandır. Yeni araşdırmaya görə, siçanların beynində bu xüsusiyyəti idarə edən xüsusi nahiyə mövcuddur.
AZƏRTAC “ScienceNews” saytına istinadən xəbər verir ki, Almaniyanın Humboldt Universitetindən bir qrup alim siçanların beynində onların davranışına təsir edən xüsusi hüceyrə qrupu müəyyən edib. Humboldt Universitetindən nevroloq alim Maykl Brext bildirib ki, canlının beynində duyğuları bu şəkildə idarə edə bilən nahiyənin olması bizdə insan beynində də eyni funksiyanı yerinə yetirən hüceyrələrin ola biləcəyi haqqında ilkin təəssürat yaradır.
Araşdırmanın davamında Şimal-Qərb Universitetinin nevroloq alimi Сefri Burqdorf xoş əhvali-ruhiyyə yaradan bu hüceyrə qrupunu qeyri-aktiv hala gətirib və siçanların davranışındakı dəyişikliyi müşahidə edib. Məlum olub ki, bu hüceyrələrin fəaliyyətində hər hansı problem yarandıqda siçanlarda eynən insanlarda olduğu kimi depressiya halı müşahidə edilir. Сefri Burqdorf bu tapıntının insanlarda depressiyanın müalicəsinə kömək edəcəyi qənaətindədir.
Bölmənin digər xəbərləri
