“Şimal-Cənub” marşrutunun Azərbaycandan keçən hissəsinin ötürücülük qabiliyyəti beş dəfə artıb
Moskva, 9 iyun, AZƏRTAC
“Şimal-Cənub” Beynəlxalq Nəqliyyat Dəhlizinin Azərbaycandan keçən Qərb marşrutundakı buraxılış məntəqələrinin tutumu beş dəfə artırılaraq gündə 1900 yük maşınına çatdırılıb.
AZƏRTAC xəbər verir ki, bu barədə Rusiyanın nəqliyyat naziri Andrey Nikitin TASS-a verdiyi müsahibədə bildirib.
Onun sözlərinə görə, 2026-cı ilin ilk dörd ayında “Şimal-Cənub” dəhlizi boyunca yükdaşımalarının ümumi həcmi 87 faiz artıb. Nazir qeyd edib ki, geosiyasi vəziyyətdəki dəyişikliklər səbəbindən Şərq və Cənub marşrutlarının inkişafına əlavə təkan verilib.
Dəhlizin infrastrukturunun inkişafı barədə danışan Andrey Nikitin Moskva və Tehranın İrandakı vəziyyətin sabitləşməsindən sonra Rəşt-Astara dəmir yolu xəttinin tikintisinə başlamağı planlaşdırdıqlarını açıqlayıb.
Xatırladaq ki, “Şimal-Cənub” layihəsi çərçivəsində Rusiya və İran 2023-cü ildə İran və Azərbaycan arasında Rəşt-Astara dəmir yolunun 160 kilometrlik hissəsinin birgə tikintisi barədə müqavilə imzalayıb. Layihə Körfəz limanlarına tam dəmir yolu xidməti göstərəcək.
Nazir, həmçinin qeyd edib ki, Rusiya, Azərbaycan, Qazaxıstan və Türkmənistanın vahid logistika qiymətləndirilməsi prinsipi var və bu, yükdaşıyıcıları üçün daha əlverişli şərtlər yaradır.
Bölmənin digər xəbərləri
