ŞİMALİ AFRİKANIN ƏRƏB DÖVLƏTLƏRİ BİRGƏ SİLAHLI QÜVVƏLƏR YARATMAQ NİYYƏTİNDƏDİR

14.11.2005 [12:35]
Çap et
A⁺ A^-

AZƏRTAC ərəb informasiya agentliklərinə istinadla xəbər verir ki, Şimali Afrikanın müsəlman dövlətləri Misir, Liviya, Tunis və Əlcəzairin hərbi qulluqçularından ibarət birgə silahlı qüvvələr yaratmaq niyyətindədir. Bu məsələ həmin ölkələrin hərbi mütəxəssislərinin noyabrın 13-də Tripolidə açılan görüşündə müzakirə edilir.

Nəzərdə tutulduğuna görə, yaradılacaq millətlərarası hərbi kontingent Afrika İttifaqının (Aİ) tabeliyinə veriləcəkdir. Daimi əsasda artıq ikinci dəfədir keçirilən forum iştirakçılarının fikrincə, bu addım Aİ-nin əsas qurumlarının formalaşdırılmasını başa çatdırmağa və təşkilatın qarşısında qoyulmuş məqsədlərin yerinə yetirilməsinə imkan açacaqdır. Başlıca məqsədlərdən biri isə Afrika qitəsində təhlükəsizliyi və sabitliyi qorumaqdır.

Xatırladaq ki, Şimali Afrika ölkələri hərbi mütəxəssislərinin birinci iclası bu ilin iyulunda Liviyada keçirilmişdir.