Siyasi riyakarlar Laçın-Xankəndi yolunda xalqın iradəsini qıra bilməyəcəklər
Bakı, 19 dekabr, AZƏRTAC
Bir neçə gündür ki, Laçın-Xankəndi yolunda Azərbaycan ekoloqlarının, qeyri-hökumət təşkilatlarının və vətəndaş cəmiyyəti üzvlərinin etiraz aksiyaları sivil qaydada davam edir. Əksəriyyəti gənclər olan yüzlərlə etirazçının bir tələbi var: Qarabağ iqtisadi rayonunda ekoloji terrora son qoyulsun. Təəssüf edirik ki, nüfuzlu beynəlxalq təşkilatlar və dünyanın qüdrətli dövlətləri 30 il ərzində Ermənistanın işğalçılıq siyasətinə biganə yanaşdıqları kimi, işğal olunmuş Azərbaycan ərazilərində təbii sərvətlərin talan edilməsinə, ekoloji terrora da göz yumurlar. Bir tərəfdən Ermənistan-Azərbaycan münasibətlərini normallaşdırmaqda “canfəşanlıq” edən beynəlxalq qurumlar, digər tərəfdən işğalçı ölkənin qəddarlığına, talançılığına havadarlıq edirlər. Təbii ki, bunun bir adı var: siyasi riyakarlıq. Ancaq bu dəfə daş qayaya rast gəlib. Siyasi riyakarlar Azərbaycana nə qədər təzyiq göstərsələr də, xalqın iradəsini qıra bilməyəcək. Qarabağ iqtisadi rayonundakı təbii sərvətlərimizin talan edilməsinə yol verilməyəcək. Bu sərvətlər xalqımıza məxsusdur.
Bu fikirləri AZƏRTAC-a açıqlamasında siyasi şərhçi Əliqismət Bədəlov bildirib.
O deyib ki, Laçın-Xankəndi yolunda etiraz aksiyalarını davam etdirənlərin məqsədi həmin yolu bağlamaq deyil. Aksiya iştirakçıları olan könüllülər bu yolun Rusiya sülhməramlılarının nəzarətində olan hissəsində təbii sərvətlərimizin qeyri-qanuni yollarla istismarına və bu qanunsuzluğa göz yumulmasına etiraz edir, o cümlədən Azərbaycan dövlət qurumları nümayəndələrinin və vətəndaş cəmiyyəti üzvlərinin bununla bağlı monitorinq aparmalarına şərait yaradılmasını tələb edirlər. Neçə gündür davam edən etiraz aksiyalarına münasibət bildirməyən beynəlxalq təşkilatlar öz ərazilərimizdə sərbəst hərəkət etməmizə qarşı problemin qarşısını almaq əvəzinə, bu dəfə də günahı Azərbaycanda axtarmağa çalışırlar. Yenə də ikili standart, yenə də siyasi riyakarlıq.
Siyasi şərhçi bildirib ki, Ermənistan yenə də beynəlxalq təşkilatların siyasi riyakarlığından, hadisələrə birtərəfli yanaşmalarından istifadə edərək, guya, Laçın yolunun bağlanması, bölgədə humanitar fəlakət yaşanması, etnik təmizləmə həyata keçirilməsi barədə haray-həşir salıblar . 2020-ci il 10 noyabr tarixli üçtərəfli Bəyanatın imzalanmasından iki ildən artıq vaxt keçməsinə baxmayaraq, Ermənistan qəbul etdiyi öhdəlikləri hələ də yerinə yetirməyib və hadisələrin gedişi göstərir ki, bu barədə fikri yoxdur. Bəyanatın 7-ci bəndində açıq şəkildə bildirilir ki, daxili məcburi köçkünlər və qaçqınlar Dağlıq Qarabağın ərazisinə və ətraf rayonlara BMT-nin Qaçqınlar üzrə Ali Komissarlığının Ofisinin nəzarəti altında geri qayıdırlar. Lakin bu vaxta qədər Ermənistan tərəfindən minalanmış ərazilərin dəqiq xəritələrinin hələ də verilməməsi nəticəsində soydaşlarımızın dədə-baba torpaqlarına qayıtmaları məsələsi öz həllini tapmayıb. Eləcə də 9-cu bənddə bölgədəki bütün iqtisadi və nəqliyyat əlaqələrinin bərpa edilməsi, Azərbaycan Respublikasının qərb rayonları və Naxçıvan Muxtar Respublikası arasında nəqliyyat əlaqəsinin təhlükəsizliyinə zəmanət verilməsi qeyd edilib. Ancaq indiyədək Ermənistan tərəfi bu bəndə də əməl etməyib. Üstəlik, işğal etdiyi Azərbaycan ərazilərində təbii sərvətlərimizin talançılığını davam etdirir, həmin ərazilərdə müvafiq təşkilatların nümayəndələrinin vəzifələrini icra etməyə - monitorinq aparmalarına şərait yaradılmasına bilərəkdən problem yaradır.
Ə.Bədəlov artıq beynəlxalq təşkilatların da Ermənistanın Laçın-Xankəndi yolundan hərbi məqsədlərlə istifadə etməsindən xəbərdar olduğunu diqqətə çatdırıb. Deyib ki, həm də bəzi ərazilərdə indi də minaların basdırılmasında bu yoldan yararlanırlar. Ermənistanın sabiq prezidentlərinin rəhbərliyi və təşkilatçılığı ilə işğal dövründə törədilən hərbi cinayətlərin acısını bu gün də yaşayırıq. İndi də beynəlxalq aləmdə kriminal iş adamı kimi tanınan Ruben Vardanyanı meydana atıblar. Azərbaycanın faydalı qazıntı yataqlarının qeyri-qanuni istismarı ilə məşğul olan “Base metal” zavodunda fəhlələrlə görüşən təxribatçı “dövlət naziri” R.Vardanyan müharibənin hələ davam etdiyini deyib və Qarabağda yaşayan erməniləri Azərbaycana qarşı terror törətməyə çağırıb. Göründüyü kimi, kriminal iş adamı bölgədəki vəziyyəti öz xeyrinə dəyişməyə çalışır. Ona görə də xalqımıza məxsus olan təbii sərvətlərin talan edilməsinə və ətraf mühitə ciddi ziyan vurulmasına qarşı etiraz aksiyalarının keçirilməsi təbii haldır.
Siyasi şərhçi bildirib ki, burada heç bir yol bağlamaqdan, humanitar yardımların qarşısının alınmasından söhbət gedə bilməz. Beynəlxalq aləmə də yaxşı məlumdur ki, Laçın yolu etirazçı ekoloqlar tərəfindən deyil, Rusiya Federasiyasının sülhməramlı kontingenti tərəfindən bağlanıb. Son günlər sülhməramlılara məxsus xeyli yük maşını məhz bu yoldan keçib. Azərbaycanın vətəndaş cəmiyyəti nümayəndələrinin talan edilmiş təbii sərvətlərimizin qanunsuz daşınmasının qarşısını almaq bəzi beynəlxalq təşkilatların uydurması olan mülki təyinatlı digər nəqliyyat vasitələrinin hərəkətinin dayandırılmasına heç bir aidiyyəti yoxdur.
“Etiraz aksiyaları bizim haqq işimizdir, qanuni hüququmuzdur. Ermənistanın 30 illik işğalına 44 gün ərzində son qoyduğumuz kimi, düşmənin ekoloji fəlakətinin də qarşısını almağa qadirik. Yaxın vaxtlarda bunun da şahidi olacağıq”, - deyə Ə.Bədəlov vurğulayıb.
Bölmənin digər xəbərləri
