Soçi görüşünün nəticələrini Azərbaycan tərəfi üçün olduqca uğurlu qiymətləndirmək olar
Moskva, 27 noyabr, AZƏRTAC
Soçidə Rusiya Prezidenti Vladimir Putin, Azərbaycan Prezidenti İlham Əliyev və Ermənistanın baş naziri Nikol Paşinyan arasında üçtərəfli görüşün nəticələrini Azərbaycan tərəfi üçün olduqca uğurlu qiymətləndirmək olar.
Soçi səfəri çərçivəsində Azərbaycan və Rusiya prezidentləri arasında keçirilən ikitərəfli görüşdə ölkə başçılarının dostluq və əməkdaşlıq münasibətlərinə xüsusi önəm verdiyi aydın nəzərə çarpır.
Rusiya Prezidenti Vladimir Putin ölkələrimiz arasında strateji tərəfdaşlığın çox uğurla inkişaf etdiyini, pandemiya ilə bağlı məhdudiyyətlərə baxmayaraq, əmtəə dövriyyəsinin həcminin artdığını qeyd edib. Eyni zamanda, humanitar əlaqələrin yüksək səviyyədə olduğunu vurğulayan Rusiya lideri rus dilinin inkişafına və dəstəklənməsinə göstərilən diqqətə görə dövlətimizin başçısına təşəkkürünü bildirib.
Prezident İlham Əliyev Azərbaycan-Rusiya əlaqələrini strateji tərəfdaşlıq kimi qiymətləndirərək qeyd edib ki, ölkələr bütün istiqamətlər üzrə qarşılıqlı münasibətlərin səviyyəsini daha da yüksəltmək əzmindədir və hazırda iqtisadiyyatın, nəqliyyatın əksər sahələrinə, humanitar əməkdaşlığa aid 7 yol xəritəsi reallaşdırılır.
Daha sonra keçirilən üçtərəfli görüş birgə bəyanatın imzalanması ilə başa çatıb. Bəyanatın mətnində “Qarabağ” sözünün işlənməməsi danışıqların yalnız Ermənistan-Azərbaycan münasibətləri ətrafında aparıldığına işarədir. Bəyanatda “Dağlıq Qarabağın statusu” barədə də danışılmır.
Ermənistan baş nazirinin qaldırdığı “hərbi əsirlər” məsələsi də yekun sənəddə əksini tapmayıb. Belə ki, Azərbaycan Prezidenti hərbi əməliyyatlar bitəndən sonra 100 nəfərdən çox erməni hərbi qulluqçusunun qaytarıldığını diqqətə çatdırıb.
Nikol Paşinyanın qaldırdığı digər məsələ - Azərbaycan-Ermənistan sərhədində gərginliklə bağlı səsləndirdiyi fikirlər də sənəddə əks olunmayıb. N.Paşinyan üçtərəfli görüşdə çıxışı zamanı bu il mayın 12-dən bəri Ermənistan-Azərbaycan sərhədində böhranlı vəziyyətin yaranmasından, Azərbaycan qoşunlarının Ermənistanın suveren ərazisinə daxil olmasından şikayətlənsə də, yekun mətbuat konfransında bu mövzuya da toxunulmayıb.
Bəyanatın mühüm bəndlərindən biri də regionda bütün iqtisadi və nəqliyyat əlaqələrinin bərpası, regionun iqtisadi potensialının üzə çıxarılması məqsədilə konkret layihələrin tezliklə həyata keçirilməsinin zəruriliyinin vurğulanmasıdır. Beləliklə, görünür ki, Zəngəzur dəhlizinin gerçəkləşməsi artıq yaxın dövrün məsələsidir və Rusiya tərəfi bu dəhlizin açılmasında maraqlıdır.
Bəyanatda qeyd olunur ki, Rusiya Azərbaycan ilə Ermənistan arasında münasibətlərin normallaşması, Azərbaycan və erməni xalqları arasında etimad mühitinin formalaşması, habelə regionda mehriban qonşuluq münasibətlərinin bərqərar olması məqsədilə bundan sonra da hər cür zəruri köməyi göstərəcək. Azərbaycan Prezidentinin rusiyalı həmkarı ilə ikitərəfli görüşdə bildirdiyi kimi, artıq bu istiqamətdə addımlar atılır. Rusiya Prezidentinin humanitar əməkdaşlıq üzrə xüsusi nümayəndəsi Mixail Şvıdkoyun Azərbaycanın və Ermənistanın intellektualları, mədəniyyət xadimləri arasında Rusiya tərəfin fəal iştirakı ilə əlaqələrin nizamlanması kimi çox mühüm bir missiya ilə Bakıya səfərini də diqqətə çatdırıb.
Beləliklə, Soçi görüşündə Azərbaycanın qarşıya qoyduğu bütün məsələlər ətrafında fikir mübadiləsi aparıldığını və müsbət qərarlar qəbul olunduğunu demək mümkündür. Azərbaycan-Ermənistan sərhədində sabitlik və təhlükəsizlik səviyyəsinin artırılması məqsədi ilə dövlət sərhədinin delimitasiyası və demarkasiyası üzrə ikitərəfli komissiyanın yaradılması isə gələcəkdə böyük sülh sazişinin imzalanması istiqamətində atılan mühüm addımdır.
Fəridə Abdullayeva
AZƏRTAC-ın xüsusi müxbiri
Moskva
Bölmənin digər xəbərləri
