Somali 30 il ərzində ilk dəfə yeni pul banknotları çap edəcək
Bakı, 14 aprel, AZƏRTAC
Somali Mərkəzi Bankının əsas məqsədi milli valyutanı bərpa edərək pul-kredit siyasətinə nəzarəti tam ələ almaqdır.
AZƏRTAC xəbər verir ki, bu fikri Mərkəzi Bankın sədri Əbdürrəhman Məhəmməd Abdullahi söyləyib.
“30 ildən çoxdur ki, Somali iqtisadiyyatı dollarlaşıb. Biz Somali şillinqini yenidən dövriyyəyə buraxmayana qədər ölkədə pul-kredit siyasətini həyata keçirmək çətin olacaq”, - deyə bankın rəhbəri bildirib. O, milli valyutanın nə vaxt çap ediləcəyi barədə məlumat verməsə də, yanvar ayında Mərkəzi Bankın sədr müavini Əli Yasin Vardhere bunun gələn ilə hədəflədiyini demişdi.
Somalidə vətəndaş müharibəsinin başladığı 1991-ci ildən bəri pul əsginası çap edilməyib. Otuz il ərzində dövriyyədə olan banknotların əksəriyyəti sıradan çıxıb. Onları ABŞ dolları və cinayətkar qruplaşmalar tərəfindən çap olunan saxta əsginaslar əvəzləyib. 2017-ci ildə Beynəlxalq Valyuta Fondu (BVF) hesablayıb ki, Somali iqtisadiyyatında dövr edən yerli valyutanın 98 faizi saxtadır.
Somali Mərkəzi Bankı BVF-nin dəstəyi ilə milli valyutanın çap edilməsi planları üzərində işləməyə başlayıb və sonradan onlara Dünya Bankı da qoşulub.
Bölmənin digər xəbərləri
