Son iki gündə Gürcüstanda 3 zəlzələ qeydə alınıb
Tbilisi, 8 iyul, AZƏRTAC
İyulun 8-də Gürcüstanda azərbaycanlıların yığcam yaşadıqları Kvemo Kartli-Borçalı bölgəsinin Dmanisi rayonunun Sameba kəndi yaxınlığında növbəti dəfə zəlzələ qeydə alınıb.
AZƏRTAC xəbər verir ki, bu barədə Milli Seysmoloji Monitorinq Mərkəzi məlumat yayıb.
Bildirilir ki, yeraltı təkanlar yerli vaxtla saat 10:26-da 3,2 bal gücündə olub.
Məlumata görə, bu son iki gündə qeydə alınan 3-cü, iyunun 25-dən bu günədək isə 9-cu zəlzələdir.
Dmanisi Bələdiyyəsinin Yırğançay kəndi yaxınlığında iyulun 7-də saat 22:20-də baş verən zəlzələnin gücü 3,8 bal olub.
Qeyd edək ki, Gürcüstan orta seysmik aktiv zona hesab olunur.
Gürcüstanda ən güclü zəlzələ 1991-ci ildə 7 bal gücündə ölkənin qərbində, Raça və İmereti regionunda olub. Zəlzələnin episentrində yeraltı təkanların gücü 9 bal olub.
Həmin təbii fəlakət zamanı 200 nəfərədək insan həyatını itirib, 46 min ev və minlərlə sənaye obyekti dağılmışdı.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
