Sorğu: Ukrayna Prezidentinə etimad reytinqi artır
Kiyev, 14 may, AZƏRTAC
Ukrayna Prezidenti Volodimir Zelenskiyə etimad reytinqi artmaqda davam edir və keçən ilin sonu ilə müqayisədə demək olar ki, 1,5 dəfə artıb.
AZƏRTAC bu barədə Kiyev Beynəlxalq Sosiologiya İnstitutunun keçirdiyi sorğunun nəticələrinə istinadla xəbər verir.
2025-ci il may ayının birinci yarısına olan məlumata görə, ukraynalıların 74 faizi Zelenskiyə inanıb, 22 faizi isə etimad göstərməyib. Güvən-etimadsızlıq balansı +52 faizdir.
Kiyev Beynəlxalq Sosiologiya İnstitutunun 2025-ci ilin martında keçirilən sonuncu sorğusu ilə müqayisədə Prezidentə inam artıb, ona etibar edənlərin sayı 69 faizdən 74 faizə yüksəlib, etimad göstərməyənlər isə 28 faizdən 22 faizə düşüb.
Müvafiq olaraq, inam-etimadsızlıq balansı +41 faizdən +52 faizə yüksəlib .
2024-cü ilin dekabrında ukraynalıların 52 faizi Prezidentə etimad göstərdikdən sonra onun reytinqi xeyli artıb.
İnstitutun direktor müavini Anton Qruşetskinin qeyd etdiyi kimi, çətin beynəlxalq vəziyyət və müharibəni bitirmək üçün mümkün danışıqlar ətrafında gərgin müzakirələr fonunda Prezident Zelenski “yüksək ictimai dəstəyi və legitimliyini qoruyur”.
Kiyev Beynəlxalq Sosiologiya İnstitutu 2-12 may 2025-ci il tarixlərində ictimai rəy sorğusu keçirib və 1010 respondentlə müsahibələr aparılıb.
Ukraynanın aparıcı sosioloji şirkətlərinin fikrincə, Donald Tramp hakimiyyətə gəldikdən və ABŞ-ın Ukrayna ilə bağlı siyasəti dəyişdikdən sonra 2025-ci ilin əvvəlindən Zelenskinin reytinqi xeyli artıb.
Emil Hüseynli
AZƏRTAC-ın xüsusi müxbiri
Kiyev
Bölmənin digər xəbərləri
