Sözünü də, əməlini də dağlar qədər uca tutan igid zabit VİDEO
Yevlax, 14 oktyabr, Tahir Ağaməmmədov, AZƏRTAC
Ölkəmizin ərazi bütövlüyünün təmin olunması uğrunda silaha sarılıb canını fəda edənlərdən biri də “Dağlar oğlu” ləqəbli baş leytenant Ceyhun Əyyubovdur. Uşaqlıqdan vətənpərvərliyi ilə seçilən Ceyhunun amalı hərb sənətinə yiyələnib torpaqlarımızı işğaldan azad etmək idi. Sözünü də, əməlini də dağlar qədər uca tuturdu. İgid baş leytenant Vətənin dağlarında döyüşdü, dağlar qoynunda şəhid oldu. O, uşaqkən qurduğu arzuların arxasınca getdi və həmin arzular onu şəhidlik zirvəsinə apardı.
AZƏRTAC-ın bölgə müxbiri Yevlax şəhərində şəhidin valideynləri ilə görüşüb, onlarla qəhrəman Vətən oğlunun həyatı və şərəfli döyüş yolu haqqında söhbət edib.
Atası Savalan kişi deyir ki, Ceyhunun uşaq yaşlarından hərbiyə marağı olub: “Həmişə deyirdi ki, böyüyəndə hərbçi, zabit olacam, torpaqlarımızı azad edəcəyəm. O, istəyinə uyğun olaraq hərbçi oldu və torpaqlarımızın azadlığı uğrunda canını fəda etdi... Mən fəxr edirəm ki, Ceyhun kimi oğlum var”.
Bir ana üçün övladının yoxluğu qədər ağır bir dərd yoxdur. Amma bu dərd əgər Vətən yolundadırsa, o zaman həm də qürurdur. Arzu xanım da oğlunun Vətənə xidmətindən, bu yolda şəhadətə yüksəlməsindən qürurla danışır: “Ceyhun 1992-ci ildə Yevlax şəhərində anadan olub. 1998-ci ildə 1-ci sinfə gedib. Ceyhunda vətənpərvərlik hissi hələ uşaq yaşlarından çox yüksək idi. 2007-ci ildə dedi ki, Cəmşid Naxçıvaniski adına hərbi liseyə qəbul olmaq istəyir. Dedim, yaxşı fikirdir. Sənədlərini verdi, qəbul oldu. Sonra Ali Hərbi Məktəbə qəbul oldu. Qardaşı 2012-ci ildə, Ceyhun isə 2014-cü ildə Ali Hərbi Məktəbi bitirdi. Bir il də təlim-tədris mərkəzində oxudu, 2015-ci ildə Daşkəsənə göndərildi, taqım komandiri kimi işə başladı. Daha sonra xidmətini Murovdağ yüksəkliyində davam etdirdi. Ona “Dağlar oğlu” deyirdilər. Çətin şəraitdə olsa belə, Vətənə həvəslə xidmət edirdi. Polad Həşimovun şəhid olması Ceyhunu çox sarsıtmışdı.
44 günlük Vətən müharibəsi başlayan gün Murovdağ yüksəkliyində döyüşlərdə iştirak etdi və şəhid oldu. O, həm döyüşür, həm də yaralı əsgərləri təhlükəli yerdən çıxarırdı. Döyüşlərdə 4 nəfəri mühasirədən çıxarıb, yaralarını sarıyıb. Özü isə mühasirədə qalıb. Ayağından yaralanıb. Sonra qarnından və başından vurublar. Nəşini 14 gün sonra götürmək mümkün olub. Oktyabrın 12-də bizə zəng gəldi ki, nəşini gətirmişik. Həmişə mənə deyirdi ki, nə sən məndən keçərsən, nə mən səndən. Amma o, məndən keçdi, Vətəni, torpağı seçdi. Buna görə də fəxr edirəm. Oğlum şərəflə getdi bu dünyadan”.
Ceyhun Əyyubov Azərbaycan Prezidentinin sərəncamlarına əsasən ölümündən sonra “Vətən uğrunda”, “İgidliyə görə”, “Kəlbəcərin azad olunmasına görə” medalları, 3-cü dərəcəli “Rəşadət” ordeni ilə təltif olunub. Xatirəsinin əbədiləşdirilməsi üçün küçəyə adı verilib, ev muzeyi yaradılıb.
Bölmənin digər xəbərləri
