Şri-Lanka həbsxanasında dustaqlar “koronavirus” qiyamı qaldırıb
Bakı, 30 noyabr, AZƏRTAC
Şri-Lankanın ən böyük şəhəri olan Kolombo ətrafında yerləşən həbsxanalardan birində “koronavirus” qiyamı baş verib.
AZƏRTAC “Associated Press” agentliyinə istinadla xəbər verir ki, insident noyabrın 29-da Kolombo şəhərindən 15 kilometr məsafədə yerləşən Mahara islah müəssisəsində qeydə alınıb.
Qiyama həbsxana administrasiyasının koronavirus testi və infeksiyaya qarşı digər mübarizə tədbirləri barədə dustaqların xahişindən imtina etməsi səbəb olub. Məhbuslar həbsxanaya nəzarəti ələ keçirməyə, həmçinin qaçmağa cəhd göstəriblər. Həbsxana mühafizəçilərinin atəş açması nəticəsində 6 məhbus həlak olub, 37 nəfər, o cümlədən iki mühafizəçi yaralanıb. Qiyamı yatırmaq üçün hadisə yerinə əlavə polis qüvvələri göndərilib.
Son bir neçə həftə ərzində ölkədəki bəzi həbsxanalarda da analoji hadisələr qeydə alınıb. Hazırda Şri-Lankanın beş həbsxanasında mindən çox koronavirus xəstəsi var, onlardan azı ikisi ölüb.
Qeyd edək ki, pandemiyanın statistikasını aparan “Worldometer” saytının son məlumatına əsasən, indiyədək Şri-Lankada koronavirusa 23 min 484 yoluxma və 116 ölüm halı aşkarlanıb.
Bölmənin digər xəbərləri
