Şri-Lankada siklon 56 nəfərin ölümünə səbəb olub
Bakı, 28 noyabr, AZƏRTAC
Cümə günü Şri-Lankanı tropik siklon vurub, 56 nəfər ölüb, 23 nəfər itkin düşüb.
AZƏRTAC xəbər verir ki, Meteorologiya İdarəsi fırtınanın növbəti 12 saat ərzində ada boyunca irəlilədikcə güclənə biləcəyi barədə xəbərdarlıq edib.
Fövqəladə Halların İdarə Edilməsi Mərkəzinin (DMC) məlumatına görə, bir sıra bölgədə gündəlik yağıntı miqdarı 300 millimetri keçib. Siklonun yaratdığı güclü yağışlar, daşqınlar və torpaq sürüşmələri nəticəsində 44 mindən çox sakin zərər çəkib. Hakimiyyət orqanları zərər çəkmiş ərazilərdən əhalini təxliyə edir. İnsanları xilas etmək üçün 20 mindən çox hərbi qulluqçu səfərbər edilib.
Siklon səbəbindən bütün dövlət idarələri və məktəblər bağlanıb, Kolombo Fond Birjası davam edən leysan yağışları səbəbindən hərracların erkən dayandırıldığını elan edib.
Şri-Lanka Prezidenti Anura Kumara Dissanayake Turizm İdarəsinə ölkədə fövqəladə vəziyyət səbəbindən çətinlik çəkən xarici turistlərə kömək etmək üçün lazımi tədbirlər görməyi tapşırıb.
Limanlar və mülki aviasiya naziri Anura Karunatilake jurnalistlərə bildirib ki, vəziyyət pisləşərsə, Şri-Lanka əsas hava limanından uçuşları Hindistanın cənubundakı Trivandrum və ya Koçin hava limanlarına yönləndirə bilər.
Bölmənin digər xəbərləri
