Stolüstü tennisçimiz Nihad Məmmədov Ginnesin Rekordlar Kitabına düşə bilər
Bakı, 12 aprel, AZƏRTAC
Stolüstü tennisçi Nihad Məmmədov adını Ginnesin Rekordlar Kitabına yazdırmağa yaxındır.
Azərbaycan Stolüstü Tennis Federasiyasından (ASTF) AZƏRTAC-a verilən məlumata görə, milli komandanın üzvü bu gün “Şüa İdman Kompleksi”ndə təşkil olunan mərasimdə topu uzaq məsafədən oyuna daxil etməkdə qeydə alınan dünya rekordunu yeniləməyə cəhd göstərib.
O, Gənclər və İdman Nazirliyinin, Azərbaycan Stolüstü Tennis Federasiyasının rəsmilərinin və beynəlxalq dərəcəli hakim Zaur Mikayılovun nəzarəti ilə bu hərəkəti 17 metr məsafədən uğurla həyata keçirib. Nihad Məmmədovun göstəricisi ASTF tərəfindən müvafiq qurumun baş ofisinə göndərilib. Rəsmi cavab təxminən 4-8 həftədən sonra veriləcək.
Qeyd edək ki, sözügedən rekord (16.70) son olaraq türkiyəli Osman Gürcüyə məxsus idi.
Bölmənin digər xəbərləri
