Sudan hökuməti sel fəlakəti ilə əlaqədar 3 aylıq fövqəladə vəziyyət elan edib
Qahirə, 5 sentyabr, AZƏRTAC
Sudan hökuməti dağıntılara və 99 insanın ölümünə səbəb olan sel və daşqınların fəsadlarını aradan qaldırmaq məqsədilə ölkədə 3 aylıq fövqəladə vəziyyət elan edib. AZƏRTAC xəbər verir ki, bu barədə rəsmi SUNA agentliyi Sudan Nazirlər Kabinetinə istinadla məlumat yayıb.
Sudanın Əmək və Sosial İnkişaf Nazirliyinin məlumatında bildirilir ki, təbii fəlakət nəticəsində 49 nəfər yaralanıb, 100 mindən artıq ev dağılıb və 1 milyona yaxın insan evsiz-eşiksiz qalıb. Qeyd olunub ki, Sudanda bu cür güclü sel və daşqınlar ötən əsrdə - 1946-cı və 1988-ci illərdə baş verib.
Fövqəladə vəziyyətlə bağlı yaradılmış komissiya insanların sığınacaq və ərzaqla təmin edilməsi, müvəqqəti yaşayış məskənlərinin tikintisini həyata keçirəcək. Artıq bir çox ölkə, o cümlədən qonşu Misir və Körfəz dövlətləri Sudana humanitar yardım göndəriblər.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
