SUMQAYITDA BİZNES-İNKUBASİYAYA DAİR FORUM KEÇİRİLMİŞDİR

24.12.2005 [17:28]
Çap et
A⁺ A^-

Sumqayıtda biznes-inkubasiyaya dair milli forum keçirilmişdir. Onun təşkilatçıları “İNFOTEK” İctimai Birliyi, “InfoDev” beynəlxalq təşkilatı, Dünya Bankı və şəhərin icra hakimiyyətidir. Kiçik və orta biznesin inkişafı üzrə həyata keçirilən biznes-inkubasiyaya dair layihənin ölkəmizdə analoqu yoxdur. Ondan başlıca məqsəd ən yeni texnologiyalardan istifadə etməklə, burada biznes-inkubator yaratmaqdır. Bu, yerli firma və şirkətlərin inkişafını sürətləndirməklə, şəhərin sosial-iqtisadi inkişafında tezliklə əksini tapacaqdır. Bu məqsədlə “İNFOTEK” və Sumqayıt İcra Hakimiyyəti arasında memorandum imzalanmışdır.

Layihə iki mərhələdə həyata keçirilir. Birinci mərhələdə layihədə iştirak etmək istəyən 100 nəfərdən 37-si xüsusi məşğələ keçmiş, 10 mütəxəssis menecer sertifikatı almışdır. Sertifikatlar forumda təqim edilmişdir. Yeni ilin yanvarından isə layihənin ikinci mərhələsi başlanacaqdır.

Forumda layihənin konsepsiyası təqdim olunmuşdur. Sonra layihənin təşkilatçıları Sumqayıt sahibkarlarının problemlərindən danışmışlar.

Tədbir iştirakçıları özəl bölmənin inkişafında inkubatorların rolu və onların əhəmiyyəti üzərində ətraflı dayanmışlar. Qeyd olunmuşdur ki, Sumqayıt bu baxımdan təsadüfən seçilməmişdir. Son illər şəhərdə biznes üçün əlverişli mühitin yaradılması böyük rol oynamışdır.

Biznes-inkubasiyaya dair milli forum işgüzar, konstruktiv və maraqlı şəraitdə keçmişdir. Sumqayıt İcra Hakimiyyətinin, İqtisadi İnkişaf Nazirliyinin, habelə aparıcı bankların nümayəndələri və başqaları öz fikirləri ilə bölüşmüş, bir çox maraqlı təkliflər irəli sürmüşlər.

Biznes-inkubatorların yaradılması 2006-2007-ci illərdə həyata keçiriləcəkdir.

Forum çərçivəsində Sumqayıtın özəl firmaları məhsullarının sərgisi təşkil olunmuşdur.