SUMQAYITDA GƏNCLƏR GÜNÜ MÜNASİBƏTİLƏ SİLSİLƏ TƏDBİRLƏR KEÇİRİLİR
Sumqayıt, 3 fevral (AZƏRTAC). Sumqayıt haqlı olaraq gənclər şəhəri adlanır. Statistik məlumata görə, şəhər əhalisinin 70 faizi uşaqlar, məktəblilər və gənclərdir. Gənclər günü münasibətilə şəhərdə silsilə tədbirlər keçirilmişdir.
Bir sıra gənclər təşkilatlarının və klubların rəhbərləri, habelə şəhər gənclərinin nümayəndələri ümummilli lider Heydər Əliyevin onun adını daşıyan prospektdə ucaldılmış abidəsini ziyarət etmiş, önünə gül dəstələri düzmüşlər. Sonra gənclər şəhərdəki Şəhidlər xiyabanında olmuşlar.
Bülbül adına məktəbin akt salonunda keçirilən təntənəli mərasimdə 12 müxtəlif nominasiya üzrə qaliblərin adları elan olunmuşdur.
Şəhər icra hakimiyyətinin başçısı Vaqif Əliyev salona toplaşanları salamlayaraq, oğlan və qızları Gənclər günü münasibətilə təbrik etmiş, respublikamız müstəqillik əldə etdikdən sonra gənclər hərəkatının təşəkkülündən və inkişafından danışmış, ulu öndər Heydər Əliyevin gənclər qurumlarının formalaşmasında rolunu xüsusi vurğulamışdır.
V.Əliyev Sumqayıt gənclərinin müxtəlif sahələrdə uğurlarından söhbət açaraq demişdir ki, 142 sumqayıtlı birinci kurs tələbəsi 600-dən çox bal toplamışdır. Prezident təqaüdü alan tələbələrin sayı artıq 42 nəfərə çatmışdır. Respublikanın 10 ən yaxşı idmançısından üçü sumqayıtlıdır. Bütün bunlar dövlətimizin başçısı İlham Əliyevin xüsusi diqqəti sayəsində təhsil, mədəniyyət və idman müəssisələrinin maddi-texniki bazasının möhkəmləndirilməsi, gənclərin potensialının inkişafı üçün əlverişli şəraitin yaradılması sayəsində mümkün olmuşdur.
Hər il gənclər günü şəhərdə ən yaxşı gənclər təşkilatı və fərdi nominasiyalar üzrə müsabiqəyə yekun vurulur. Qaliblərə mükafatlar, diplomlar və hədiyyələr təqdim olunur.
Bölmənin digər xəbərləri
