Süni intellekt insanlara məsləhət verməkdə uğurlu sayıla bilməz – sosioloq
Bakı, 4 dekabr, Sevda Cəfərova, AZƏRTAC
Süni intellektdən istifadənin etik çərçivələri bu gün artıq qlobal çağırışdır. Süni intellektdən istifadə etmək cəmiyyət həyatının bütün sahələrində müəyyən praqmatik əhəmiyyətə malikdir. Lakin süni intellektdən istifadə zamanı bəzi məsələlər nəzərə alınmalıdır. Təsadüfi deyil ki, ölkəmizdə süni intellektlə bağlı Strategiya qəbul edilib. Həmin sənəddə qeyd olunur ki, süni intellektdən istifadə və etik çərçivələr gözlənilməlidir. Süni intellektdən istifadə zamanı hüquqi məsuliyyət məsələləri gözlənilməlidir və təhlükəsizlik təhdidləri nəzərə alınmalıdır.
Bunu AZƏRTAC-a açıqlamasında sosial məsələlər üzrə ekspert, sosioloq Üzeyir Şəfiyev deyib. Onun sözlərinə görə, bəzən süni intellektdən istifadə edərək cəmiyyətdə mənəvi, əxlaqi dəyərlərimizi, ailə institutlarımızı aşağılamaq cəhdləri olur: “İstifadəçilər bilməlidirlər ki, bu, hüquqi məsuliyyət yaradır. Amma bütövlükdə süni intellektdən həm təhsil, həm karyera, həm də işgüzar münasibətlərdə istifadə olunur. Şübhəsiz ki, süni intellekt də insanın yaratdığı bir proqram sistemidir və heç bir texnologiya insandan üstün ola bilməz. Süni intellektdə nə qədər funksionallıq olsa belə, insanı əvəz edə bilməz. Süni intellektdə empatiya, duyğu və bir sıra digər məziyyətlər yoxdur. Amma bununla yanaşı, süni intellekt insanlara bu və ya digər sahələrdə kömək edir. Bəzən insanlar süni intellektdən həddindən artıq istifadə etmək istəyir və hətta şəxsi, özəl həyatlarında məsləhətlər alırlar. Bu istiqamətdə onlar səhvə yol verirlər. Çünki süni intellekt alqoritm əsasında fəaliyyət göstərir və ümumi informasiya bankına malikdir və insanlara məsləhət verməkdə uğurlu sayıla bilməz”.
Sosioloq bildirib ki, informasiya, data ilə bağlı məlumatları isə süni intellektdən almaq olar. Ancaq onun da bilgisi informasiya bankına topladığı informasiya deposundan asılıdır: “Güman edirəm ki, süni intellekt daim təkmilləşir. Bu təkmilləşmə, təbii ki, insanların verdiyi informasiyalar sayəsində olur. İnsanlar özlərini qorumalıdırlar ki, onların ötürdüyü informasiya, onlarla bağlı məlumat və şəxsi məlumatlar, bilgilər süni intellekt tərəfindən ələ keçməsin və onlara qarşı təhdidlər yaranmasın”.
Bölmənin digər xəbərləri
