Tacikistan hakimiyyəti Rusiyadakı vətəndaşlarını qeydiyyata düşməyə çağırıb
Bakı, 17 aprel, AZƏRTAC
Rusiyada ərazisində yaşayan Tacikistan vətəndaşları iyunun 15-nə qədər sənədlərini qaydaya salmalıdır. Əks halda onlar Rusiyadan deportasiya edilə bilərlər.
AZƏRTAC xəbər verir ki, Tacikistan Əmək, Miqrasiya və Məşğulluq Nazirliyi Rusiyada yaşayan həmvətənlərinə bu mövzuda çağırışla müraciət edib.
Bu ərəfədə Rusiya Daxili İşlər Nazirliyi MDB ölkələrindən Rusiya ərazisində qanunsuz yaşayan vətəndaşlarını iyunun 15-dək çıxarmağı tələb edib. MDB-nin Parlamentlərarası Assambleyasının iclasında çıxış edən Rusiya daxili işlər nazirinin birinci müavini Aleksandr Qorovoy ölkə ərazisində qanunsuz olaraq bir milyondan çox MDB vətəndaşının yaşadığını bildirib.
Nazirliyin məlumatına görə, Rusiyada ən çox Özbəkistandan olan qanunsuz mühacirlər yaşayır - 332 min nəfər. Ölkə ərazisində, həmçinin Tacikistandan 247 min, Ukraynadan 152 min, Azərbaycandan 120 min, Qırğızıstandan 115 min, Ermənistandan 61 min, Moldovadan 56 min, Qazaxıstandan 49 min qeyri-leqal mühacir məskunlaşıb.
Bölmənin digər xəbərləri
