Tbilisidə azərbaycanlı rəssamın fərdi sərgisi açılacaq
Tbilisi, 1 fevral, AZƏRTAC
Tbilisidəki M.F.Axundzadə adına Azərbaycan Mədəniyyəti Mərkəzində gənc azərbaycanlı rəssam Könül Babayevanın rəsm əsərlərindən ibarət fərdi sərgisi açılacaq.
K.Babayeva AZƏRTAC-a müsahibəsində deyib ki, əsasən ana-övlad məhəbbətinə həsr olunmuş sərgi martın 3-də Gürcüstanda qeyd olunan Analar Gününə həsr olunacaq.
Rəssam bildirib ki, tədbirin məqsədi anaların, ana təbiətin və ümumiyyətlə ana sevgisinin və bu sevginin təzahürlərinin incəsənət əsərləri vasitəsilə nümayiş etdirməkdir. Onun sözlərinə görə, sərgidə təkcə analarla onların körpə övladlarının sevgisini təsvir edən rəsmlər deyil, ümumilikdə təbiətdəki canlılar arasındakı bağları əks etdirən əsərlər də təqdim olunacaq.
Rəssam qeyd edib ki, 20-yə yaxın əsərin nümayiş etdiriləcəyi sərginin məqsədi sevginin universal dəyər olduğunu göstərməkdir.
“Ana sevgisi təkcə insanlarda yox, təbiətdə də öz təcəssümünü tapır. Sərgi vasitəsilə hər kəsə bu gözəl duyğuları çatdırmaq istəyirəm”,– deyə K.Babayeva vurğulayıb.
Qeyd edək ki, Könül Babayeva artıq iki ildir Gürcüstanda yaşayır və fəaliyyət göstərir. Rəssamın ötən il 8 Mart - Beynəlxalq Qadınlar Gününə həsr olunmuş ilk sərgisi də M.F. Axundzadə adına Azərbaycan Mədəniyyət Mərkəzində təşkil olunub.
Tbilisi
Bölmənin digər xəbərləri
